• Home
• About BongoCelebrity
• UMEZISOMA HIZI?
• BC GUESTBOOK
•            Receive Email Alerts!
• Join Our Facebook Group!

Wadhamini / Sponsors

Current Date:

Recent Comments

Sponsored Ads

Blogroll

BC Archives

Globe Tracker

Sponsored Ads

Register for Events

20

Comments

→ July 8, 2009 → Tags: Bongo Fleva, Burudani, Muziki, Single/Mpya →

Huwezi kuthubutu kuzungumzia muziki wa kizazi kipya au Bongo Flava kama unavyojulikana kote ulimwenguni bila kumzungumzia na kumuhusisha moja kwa moja na muziki huo,Joseph Mbilinyi(pichani) ambaye kisanii tulianza kwa kumjua kama 2 Proud kabla hatujamuita Mr.II na baadaye Sugu.

Sugu sio tu alichangia kuipa Bongo Fleva utambulisho rasmi katika jamii,bali pia ni miongoni mwa wasanii “waasisi” walioamua kwa makusudi kuanza kutumia lugha ya Kiswahili katika kughani(rap) huku wakiwa na ujumbe ambao uligusa jamii inayowazunguka badala ya ile ya kusimuliwa au kuona katika luninga.Ukipenda unaweza kumwita “mwanamapinduzi”.

Hivi karibuni tulipata nafasi ya kufanya naye mahojiano.Katika mahojiano haya Sugu anabainisha mambo kibao yakiwemo masuala kama vile alipo na anachokifanya ,ushauri wake kwa wasanii wenzake katika masuala ya haki zao nk.Pia Sugu anajibu swali ambalo wengi wanaliogopa;je muziki wa bongo fleva uko katika njia sahihi?Kuna tofauti gani katika muziki huu tangu walipoanza na walipo hivi sasa?

Kubwa ya yote ni kwamba Sugu ameamua kuwapa zawadi maalumu mashabiki wake. Anakuja na albamu mpya! Ukisoma mahojiano haya mpaka mwisho utaweza kusikiliza single mpya kutoka kwake inayokwenda kwa jina Kambarage.

BC: Sugu, Karibu sana ndani ya BC.Mambo vipi?

SUGU: Asante sana mkuu.Nimeshakaribia kaka.

BC: Kwanza kabisa wapenzi wengi wa muziki wamekuwa wakituandikia wakitaka kujua ulipo na unachokifanya hivi sasa.

SUGU: Asante. Mimi kwa sasa nipo nchini Marekani. Naendelea na mitikasi ya maisha kama kawaida zikiwemo harakati zangu za muziki.

BC: Unaheshimika miongoni mwa wengi kama miongoni mwa “waasisi” wa muziki ambao leo unaitwa Bongo Fleva au muziki wa kizazi kipya.Wewe pia ni miongoni mwa wasanii wa mwanzo kabisa kuamua kurap kwa kutumia lugha ya Kiswahili moja kwa moja. Nini unadhani kilichangia uamuzi kama huo? Na je leo hii unadhani Bongo Fleva bado ipo katika muelekeo ule ule mliokuwa nao mlipoanza au kumekuwepo na muelekeo tofauti?

SUGU: Mimi nadhani sisi tuliamua kurap kwa Kiswahili ili kuweza kuwasiliana na mashabiki moja kwa moja kwa kutumia lugha ambayo wanaielewa. Nia yetu ilikuwa kufikisha ujumbe kwa watu na jamii yetu ambayo Kiswahili ndio lugha yake ya msingi.

Baada ya uamuzi ule kwa kweli hata sapoti iliongezeka sana na hivyo muziki wetu ukazidi kukua.Hiyo inatokana na ukweli kwamba watu sasa wakawa wana-sapoti kitu ambacho wakikielewa moja kwa moja tofauti na pale tulipokuwa tukitumia lugha za kigeni kama vile kiingereza.

Kuhusu kipande cha pili cha swali kwamba naonaje game kwa sasa; Nilikuwa Bongo hivi karibuni na ndio kwanza nimerejea kutoka huko.Kwa kweli muziki wetu unahitaji “overhaul” kubwa hasa kwa upande wa kibiashara. Bado kuna vilio vilio kutoka kwa wasanii. Wasanii wote niliokutana nao kilio chao kilikuwa ni hicho. Na hapa naweza kusema nilikutana kwa asilimia kubwa na wasanii wote muhimu na wanaotamba.

Na kwa upande wa sanaa yenyewe pia kunahitajika mabadiliko makubwa.Wasanii wengi wamesahau au pengine hawajui misingi iliyoujenga muziki huu. Misingi ya muziki huu ilikuwa ni kuwakilisha maisha ya jamii kwa kupitia kwenye muziki. Huu muziki ulikuwa ni kama Bunge la kitaa ambalo liliwakilisha sauti za umma. Lakini hapa katikati naona tulipotea kidogo. Wasanii wengi wanarap au kuimba vitu ambavyo hata wao wenyewe hawavijui. Sasa hapo kidogo pana tatizo. Nadhani tulifikia mahali ambapo,kama wasanii, tumefanya kosa la kuuutenganisha muziki na jamii wakati muziki wetu msingi wake ni jamii.Hilo ni kosa ambalo ni lazima lirekebishwe mara moja ili muziki huu uendelee kutamba.

BC: Nakubaliana kabisa na wewe. Sasa tukiwa bado kwenye suala hilo hilo la uhusiano wa jamii na muziki; Kwa wengi unafahamika kama “sauti ya watu” wakimaanisha kwamba umekuwa,kwa kupitia nyimbo zako,ukisema unachojisikia kusema au kuwasemea wale ambao pengine wasingeweza kusema. Ujasiri huo unaupata wapi au ni kitu gani kinakusukuma?

SUGU: Kwanza kabisa asante sana kwa compliment ya kuniita “sauti ya watu” kwani naamini kabisa kwamba hiyo ni sifa nzuri. Ujasiri wa kusema ninachojisikia unatokana na kuamini kwenye ukweli. Ukisimama na ukweli daima utadumu na ndio maana bado tupo bila kujalisha kama tuna track mpya hewani au hatuna. Hatutoki masikioni,midomoni na kwenye vichwa vya watu. Watu wote wanapenda na kuheshimu ukweli.

BC: Kwa muda sasa umekuwa kimya kwa upande wa kufyatua albamu na mambo kama hayo. Pamoja na hayo umekuwa ukiendeleza(kwa kupitia kampuni yako ya Deiwaka Entertainment) harakati mbalimbali za kuwasaidia wasanii wenzako hususani wale chipukizi katika kuhakikisha kwamba wanapata haki ya jasho lao na pia wanaendelea kufanya muziki ambao utadumisha heshima ya Bongo Fleva. Harakati hizo zinakwendaje? Nini mipango iliyopo hivi sasa katika kuendeleza harakati hizo?

SUGU: Ni kweli kwamba nimekuwa kimya kwa muda mrefu kiasi. Albamu yangu ya mwisho “Ujio wa Umri” niliitoa miaka mitatu iliyopita yaani mwaka 2006. Hii imetokana na majukumu kuongezeka hasa baada ya kuamua kuhamishia harakati zangu hapa Marekani. Pamoja na hayo,kama ulivyogusia, harakati za kupigania maendeleo ya huu muziki zinaendelea tena kwa ari mpya na nguvu mpya kuliko ile ya JK na maendeleo ya Bongo!

Katika mipango iliyopo mezani kwa sasa ni pamoja na kufungua radio station pale Dar-es-salaam ambayo itakuwa inapiga muziki wa rap/bongo flava pekee. Tumeshaanza kufukuzia taratibu za kibali kwa hili.Mimi naamini bongo fleva ina ufuasi mkubwa kwenye jamii ya watanzania na hivyo inastahili kabisa kuwa na radio yake. Hoja yangu hapa ni kwamba jamii ya chuo kikuu Mlimani ina radio yake,hata jamii ya kanisa la Mama Lwakatare na kanisa lake ina radio yake…sasa kwanini Bongo Fleva ambayo mimi naamini ina kundi kubwa tu la wafuasi kuliko hawa wengine wote isiwe na redio yake ambayo itasaidia kuongeza nguvu za maendeleo yake? Naamini pia kwamba kituo cha redio kama hicho kitasaidia kuongeza nguvu na mapambano dhidi ya ukosefu wa ajira hususani miongoni mwa vijana aidha directly or indirectly.

BC: Tukiwa bado kwenye suala hilo hilo la haki ya msanii na ingawa kwa kiasi fulani umeshazungumzia suala hili hapo juu, bado ningependa kukuuliza; wewe mwenyewe ulipitia changamoto gani wakati ulipoanza muziki? Na je leo hii unadhani mambo ni mazuri kidogo katika kuhakikisha kwamba msanii analipwa vizuri kutokana na kazi yake?

SUGU: Matatizo na changamoto nilizopitia mimi na wasanii wengine wa zamani ni nyingi mno ukilinganisha na sasa. Hapo katikati mambo yalianza kuwa poa mpaka tukaanza kujisahau. Lakini kama nilivyoeleza hapo juu, kwa sasa hali imekuwa ngumu tena na ndio maana kuna vilio vingi kutoka kwa wasanii kuhusu suala hili hili. Hali kibiashara imekuwa ngumu. Leo tunasoma mitandaoni kwamba hata wasanii wenye majina makubwa kama vile TID anapata tatizo la kuingiza albamu yake mpya sokoni! Na sio yeye tu,kuna wasanii kibao ninaowajua wana albamu ambazo zimeshakamilika lakini wanabaki nazo gheto tu wakizisikiliza na washkaji zao!

Na hata upande wa maonyesho nako pia kuna tatizo. Nilisikitika kuwa Bongo wakati wa sikukuu ya Pasaka hakukuwa na show yoyote ya maana ya Bongo Fleva mahali kama jijini Dar jambo ambalo ni tofauti na hapo miaka ya katikati kidogo. Ukiangalia kwa makini mambo kama hayo ndio utajua kwamba game lina tatizo na inahitajika mikakati ya haraka na makusudi ili kurudisha mzuka uliopotea.

BC:Kama zilivyo aina zingine za sanaa,muziki wa Bongo Flava umekuwa ukipitia vipindi mbalimbali.Kuna wakati huwa kama unataka kupotea vile na kisha ghafla unarejea tena.Unaposhuka lawama mbalimbali huelekezwa kwa watu mbalimbali wakiwemo DJs wanaochukua “kitu kidogo” na kupiga hewani wimbo wowote,Producers wanaokubali kumuingiza mtu studio hata kama anaonekana wazi kwamba hana kipaji,promoters uchwara nk.Kwa mtizamo na uzoefu wako, unadhani nani miongoni mwa watu niliowataja hapo juu anastahili lawama zaidi linapokuja suala zima la kushuka kwa muziki kwa ujumla?

SUGU: Mimi naona wote uliowataja hapo juu wanastahili lawama. Na pia lawama za ziada zinakwenda kwa watu wa idara za masoko kwenye makampuni yanayotoa udhamini kwa shughuli au matukio mbalimbali pale bongo. Hawa wangekuwa na moyo wa ku-sapoti projects za baadhi ya wasanii wenye “akili” na ubunifu moja kwa moja ingesaidia sana kuliko wao wanavyofanya hivi sasa yaani kutoa udhamini kwa makampuni hayo hayo kila wakati bila kuzingatia kwamba makampuni hayo yanaishiwa au kupungukiwa ubunifu kwa kiasi gani.

Isitoshe haya makampuni wanayoyapa udhamini kila siku ni ya wafanyabiashara wanaoangalia faida zaidi kuliko sanaa.

BC: Sugu wewe umesafiri sana katika sehemu mbalimbali za ulimwengu kutokana na kazi zako za muziki.Ni wazi kwamba katika safari zako umekutana na wanamuziki wengine wengi.Umejifunza mambo gani ya msingi ambayo ungependa labda ku-share na wanamuziki wanaochipukia hivi leo?

SUGU: La msingi nililojifunza ni kuwa katika lolote unalolifanya kwanza weka mapenzi ndani yake.Ukishaweka mapenzi ndani ya sanaa,utaifanya kwa dhati na vizuri.Matokeo yake ni kwamba hela itakuja tu maana kizuri chajiuza…

BC: Umekuwa mstari wa mbele kupinga kitu kinachoitwa “beef” miongoni mwa wasanii.Unadhani nini chanzo cha beef na unadhani zinachangia kwa kiasi gani kushusha thamani ya muziki au kubadili mtazamo wa wanajamii kwa muziki wa Bongo Fleva? Unatoa ushauri gani?

SUGU: Kweli mimi sipendi beef baina ya wasanii kwani naamini beef zinachangia kupoteza malengo ya wasanii na kuwaondolea uwezo wa kuungana na kupambana na adui zao wa kweli wanaosababisha muziki usizidi kusonga mbele.

Nadhani chanzo cha beef ni wivu tu wa maendeleo baina ya wasanii.Hamna cha zaidi.Hapo ndipo tunaposema usimchukie mchezaji bali chukia mchezo wenyewe ulivyo kama vipi!

BC: Najua kwamba ulipoanza muziki ulikuwa unavutiwa na wasanii wa kimataifa kama vile Ice Cube,NWA,2Pac Shakur na wengine.Leo hii ni wanamuziki gani wanaokuvutia zaidi?

SUGU: Kweli unanijua kaka!…anyway mpaka leo Pac anabaki kuwa juu kabisa kwenye list.Lakini pia kwa sasa mimi ni mshabiki na mfuasi mkubwa wa Jigga.Alichokifanya Hova ndani ya muziki huu na hata nje ya muziki ni soo kwa kweli.Wewe unajua kuhusu hili.

Kwa nyumbani nakubali harakati za washkaji kadhaa akiwemo Ngwea,Professor Jay,Joh Makini na FA.

BC: Najua kwamba ulishatangaza kustaafu.Pamoja na hayo,nijuavyo mimi msanii huwa hastaafu bali anapumzika tu.Sasa je nini mipango yako kisanii hivi sasa? Je mashabiki wako wategemee kitu kama albamu nyingine kutoka kwako?

SUGU: Yeah nilitangaza kustaafu mwaka 2002 na nikarudi kwa kishindo mwaka 2004.Hii ni miaka mitano sasa iliyopita! Ni kweli ni vigumu sana kwa msanii kuacha game hasa kwenye game la hip hop ambalo utamu wake uko kwenye wasanii kupeana “challenges’ kimistari na vitu kama hivyo.

Lakini hakuna kitu kisichokuwa na mwisho.Kadri majukumu ya maisha yanavyoongezeka iko siku itabidi niweke mic chini.Najua maisha yangu yote nitajihusisha na harakati za huu muziki na utamaduni wake kwani haya ndio maisha yangu na sitaweza kuyakwepa.

Na kwa mashabiki wangu,taarifa nzuri kwao ni kwamba hivi sasa niko studio mjini New York nakamilisha albamu yangu ya kumi(10) ambayo itaitwa VETO. Albamu hii ni kwa ajili yao exclusively!

BC: Una lolote ambalo ungependa kuongeza au una ujumbe wowote maalumu kwa mashabiki wako?

SUGU: Kwa mashabiki wangu popote pale walipo duniani,napenda wajue kwamba nawazimia na kuwajali kama wanavyonizimia na kunikubali toka siku ya kwanza. Chochote ninachokifanya kwenye huu muziki toka mwanzo mpaka sasa kisingewezekana bila wao.It’s has always been for love.Nawaomba waendelee kusapoti harakati zangu za mbele iwe kwenye muziki au pilika nyingine za mbeleni baada ya kuweka mic chini.

BC: Asante sana kwa muda wako Sugu

SUGU: Asante na wewe kwa kunipa nafasi mzee.

Asante kwa kufika hapa.Hii hapa ni zawadi kutoka kwa Sugu.Wimbo unaitwa Kambarage.

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Be Sociable, Share!

• 

Feedback / Comments