Kwa undani wa vichwa hivyo vya habari, bonyeza hapa au jipatie nakala yako mitaani.

Be Sociable, Share!

• 

Kila siku ya Jumanne(kama leo hivi) watanzania siku hizi hupata nafasi ya kujiongezea maarifa mbalimbali,kuburudika,kujielimisha na kujifahamisha kupitia gazeti la Kwanza Jamii kama linavyoonekana katika picha ya hapo juu.Hiyo ni taswira halisi ya gazeti la wiki hii ambalo limeshatinga mitaani.

Humo ndani utakuta makala mbalimbali kutoka kwa waandishi mbalimbali nikiwemo mimi,Jeff Msangi. Wengine ni  kama vile Maggid Mjengwa, Freddy Macha, BAP (Born Again Pagan), Subi Sabato,Prof.Joseph Mbele, Dr.Bukaza Chachage, Joseph Mihangwa, Padri Privatus Karugendo, Eliamani Laltaika bila kusahau kona ya Aunt Subira na wengine wengi.

Lakini kama uko mbali na Tanzania au kwa sababu moja au nyingine huwezi kupata kopi halisi ya Kwanza Jamii, habari nzuri ni kwamba unaweza kuperuzi habari mbalimbali kupitia mtandaoni. Bonyeza hapa.

Be Sociable, Share!

• 

Maggid Mjengwa sio jina geni.Bila shaka kabisa umewahi kumsikia,kumsoma na pengine hata kutembelea blog yake ambayo kimsingi ni kimbilio la yeyote yule anayependa kupata picha halisi ya maisha ya mtanzania wa kawaida hususani yule anayeishi kijijini kama ilivyo kwa babu na bibi yangu.Wasomaji,watembeleaji na wachangiaji wa blog yake wanapenda kumuita “Mwenyekiti”.

Yeye ni miongoni mwa waandishi wa makala zenye kuchoma kama sio kugusa hisia za wengi.Ukitaka kujua historia yake ya uandishi unaweza kuipata kwa kusoma mahojiano tuliyowahi kufanya naye siku za nyuma kwa kubonyeza hapa.

Maggid ni mpenzi wa michezo hususani wa soka.Ni mnazi wa Simba.Ni upenzi huo wa soka na michezo kwa ujumla ambao ulimfanya aanzishe gazeti lililoitwa “Gozi Spoti” ambalo lilidumu mitaani mpaka hivi karibuni alipoamua kulisitisha.

Jambo jema ni kwamba, kuondoka kwa “Gozi Spoti” kulifanyika kwa makusudi ili kulipisha gazeti jipya litakalojulikana kama Kwanza Jamii ambalo litaingia mitaani siku si nyingi chini ya usimamizi wa Ikolo Investment Ltd kampuni iliyo chini ya mwenyewe “Mwenyekiti”.Kwa hiyo tunaweza kabisa kuongeza cheo kimoja kwa “Mwenyekiti” na kumuita Mjasiriamali.

Kwanza Jamii ni jarida la uchambuzi wa masuala yanayohusu na kuigusa jamii.Haya ni pamoja na siasa,uchumi,elimu,michezo na utamaduni.Pia yatakuwemo masuala ya mazingira,jinsia na ukimwi . Ni jarida litakalokuwa linatoka kila siku ya Jumanne.

Tumepata nafasi ya kufanya mahojiano mafupi na ‘Mwenyekiti” kuhusiana na ujio wa jarida hili na pia kumdadisi kuhusu anachokiona kila atembeleapo vijiji na vijiji vya Tanzania.Anaona nini?Fuatana nasi katika mahojiano yafuatayo;

Hii ndio nembo (Logo rasmi) ya Kwanza Jamii.

BC: Natambua kwamba upo “bize” sana katika kipindi hiki ukijiandaa kumleta mwana mpya,Kwanza Jamii, hivi karibuni.Kwa hiyo shukrani sana kwa muda wako.Kwanza hebu tuambie,maandalizi yanakwendaje?

MM: Asante Jeff.Kwanza nikushukuru kwa kunipa fursa hii.Pili niwajulishe kupitia kwako,wasomaji wetu watarajiwa kuwa maandalizi ya “KJ” kwa maana ya “Kwanza Jamii” yanakwenda vyema kabisa.Ni kazi ya timu na timu iko imara.

BC: Kwanza Jamii linaingia katika ushindani wa habari na mawasiliano wakati ambapo dunia inazidi kushika muelekeo mpya kwenye masuala mazima ya habari. Waliokuwa wanaitwa “wasomaji” siku hizi ndio ‘wachangiaji” muhimu wa habari,mijadala nk.Watu wengi wanazidi kujikita mtandaoni ili kupata habari badala ya kusubiri magazeti yanayosambazwa mitaani.Kuna blogs,facebook,myspace,digg nk.Mmejiandaaje kukabiliana na ushindani huo au tuseme hali halisi ya ulimwengu wa habari na mawasiliano hivi sasa?

MM: Tunajua fika kuwa tunakwenda kwenye ushindani mgumu. Tulipokuwa tukiandaa “Gozi Spoti” tulikuwa wageni na wachanga hasa. Lakini sasa tumepata uzoefu wa kutusaidia katika mapambano yajayo.

Tunakwenda kushiriki ushindani na hatuogopi kushindwa. Ni kazi ngumu lakini tuna imani uwepo wetu utasaidia katika kupanua wigo wa kupata taarifa,maarifa na burudani.

Ni kweli kuwa tekinolojia za kisasa imesaidia sana watu kuweza kupata habari kutoka vyanzo vingi. Hata hivyo,jamii pana ya watanzania wa kule Kilosa,Ikwiriri na kwingineko,bado hawajafikiwa na tekinojia hiyo.

BC: Mtu mwingine atasema; ah tayari kuna magazeti chungu mbovu nchini Tanzania, kwanini tuongeze tena lingine?Unamwambiaje mtu kama huyo au nini kinatarajiwa kuwa tofauti kabisa kati ya Kwanza Jamii na magazeti mengine ambayo tayari yapo katika soko nchini Tanzania?

MM: Sidhani kama tumefikia mahali tunaweza kusema kuwa tuna magazeti chungu mbovu hapa Tanzania. Kwa kuangalia idadi ya watanzania, bado tuna magazeti machache.

Na katika hili la magazeti suala si wingi wa magazeti yaliyopangwa mezani bali yaliyomo ndani ya kurasa za magazeti hayo.Wasomaji wa leo si wajinga.Katika meza iliyojaa magazeti,wanajua wanachokitaka.Kwanza Jamii litakuwa na tofauti.Si muda mrefu kutoka sasa litakuwa mitaani na tofauti hiyo itaonekana.

BC: Mara nyingi (kama sio mara zote),inasemekana kwamba gazeti linapoanzishwa huwa lina “walengwa” au wasomaji watarajiwa.Kwanza Jamii litakuwa linawalenga watu gani?

MM: Kama lilivyo jina la gazeti lenyewe,mlengwa wa kwanza wa “Kwanza Jamii” ni jamii kwa maana ya wananchi.Tutajikita katika kuandika habari zitakazomsaidia mwananchi wa kawaida.Tunataka mwananchi aweze kupata habari,maarifa na burudani. 

Na maarifa haya ni yale yatakayomsaidia,kwa namna moja au nyingine, abadilishe maisha yake kutoka katika hali duni kwenda kwenye unafuu.Kwanza Jamii lina adhma pia ya kuwasaidia tuliowapa dhamana za uongozi kwamba na wao wasome fikra endelevu zitakazotolewa na wachangiaji mbalimbali wa ndani na nje ya nchi.

Ni imani yetu kuwa mchango wa fikra unaweza kabisa kusaidia kuleta mabadiliko na hatimaye maendeleo katika jamii yetu iwapo tuliowapa dhamana za uongozi watakuwa makini kufuatilia michango hiyo.

BC: Kupitia blog yako, mtu anaweza kuona picha halisi ya Tanzania. Unapita kijiji mpaka kijiji ukishuhudia hali halisi ya mwananchi wa kawaida.Je ni ujumbe gani ambao pengine unaupata kila sehemu unayokwenda na kwa hali halisi unadhani matatizo yanayowakabili wananchi huko unapopitia yanatokana na nini?Uongozi?

MM: Hili ni swali zuri sana.Na sehemu moja ya swali hili inataka maelezo marefu ya uchambuzi.Ni pale unapouliza matatizo yanayowakabili wananchi huko yanatokana na nini? Umetaja “uongozi” na kuweka alama ya kuuliza.Swali lako ni jibu pia.Naam.Jibu ndio hilo.Matatizo mengi ya wananchi yanatokana na uongozi mbovu katika ngazi hizo hizo za chini.

Majuzi hapa nilipita shule moja ya kijiji Wilaya ya Kinondoni inaitwa Tondolo.Nilipiga picha mazingira ya shule ile.Yanasikitisha.Nikaandika katika blogu yangu; kuwa miaka 48 ya Uhuru bado tuna shule kama ile!

Shule ile ni mfano mzuri wa haja ya kuhimiza utawala bora kwa kuonyesha vielelezo.Shule ile ni kielelezo cha kushindwa kwa utawala bora katika eneo lile.Kabla hatujakimbilia kwa RC tujiulize; uongozi wa kijiji unafanya nini?DC? Mbunge na kadhalika wamelishughulikiaje suala la Shule ya Msingi Tondolo?

Shule ya Msingi Tondolo anayoiongelea Mjengwa.

BC: Mjengwa nakutakia kila la kheri katika gazeti lako jipya.Nakuahidi kwamba nitakuwa msomaji na pia mchangiaji.

MM: Nami nashukuru sana kwa ushirikiano wako.

Be Sociable, Share!

• 

Irene Uwoya

Wema Sepetu

Kwa muda sasa jamaa wa Global Publishers,kupitia gazeti lao la Ijumaa,wamekuwa wakiendesha shindano lililojulikana kama Ijumaa Sexiest Girl.Kilichokuwa kinafanyika ni kwamba kila wiki mrembo mmoja alikuwa anatolewa baada ya kupata kura za chini kushinda wengine.Wapiga kura walikuwa ni wananchi,wasomaji wa gazeti la Ijumaa.Kulikuwa na namba ya simu +255 784 275 714 ambapo wananchi walikuwa wanatuma ujumbe mfupi wa maneno(SMS) wakimpendekeza msichana ambaye kwa mujibu wao anastahili kushinda.Jumla ya warembo 12 walishirikishwa katika shindano hili.Unaweza kusoma zaidi kuhusu shindano hilo kwa kutembelea tovuti ya Global Publishers na kisha katika Search andika Ijumaa Sexiest Girl.

Sasa baada ya mchakamchaka mzima,warembo wawili, Irene Uwoya na Wema Sepetu(pichani) ndio wamebakia na mshindi anatarajiwa kutangazwa Ijumaa ijayo. Inawezekana hukupata nafasi ya kupiga kura wakati shindano lilipokuwa linaendelea.Pamoja na hayo,hapa una nafasi ya kutoa maoni yako.Nani unadhani ataibuka mshindi?Kwanini?

Be Sociable, Share!

• 

Miongoni mwa habari za watu maarufu ambazo bila shaka zimegubika vichwa vya wengi wiki hii ni ile ya Mwenyekiti Mtendaji wa Makampuni ya IPP,Reginald Mengi kukanusha taarifa za gazeti moja kwamba amefunga ndoa mpya na mwanamke mmoja wa jijini Dar-es-salaam(Lilian Kimaro) na kulaumu uandishi wa habari unaokwenda kinyume na misingi ya taaluma hiyo.Kwa habari zaidi unaweza kubonyeza hapa.

Pia unaweza kubonyeza hapa ili kuona baadhi ya maswali ambayo waandishi wa habari walimbana nayo Mengi lakini akakwepa kwa kigezo kwamba wakatafute wenyewe ukweli!

Photo/Venance Nestory

Be Sociable, Share!

• 

Pichani ni Jenerali Ulimwengu.Huyu ni miongoni mwa waandishi wa habari nchini Tanzania walio na uwezo wa aina yake katika kujenga na kubomoa hoja iwe ni katika maandishi au maongezi.Makala zake siku hizi zinapatikana katika gazeti la Raia Mwema.

Photo/Bob Sankofa

Be Sociable, Share!

• 

Ukiweza kumalizia kichwa cha habari hapo juu utakuwa umepata mwangaza wa mtizamo wangu kuhusu vuta nikuvute inayoendelea kati ya Mchungaji Christopher Mtikila na Mbunge wa Igunga,Rostam Aziz.Kwa msaada zaidi wa kinachoendelea(kama bado hujafuatilia kinachoendelea) bonyeza hapa.Mwananchi amuamini nani?

Be Sociable, Share!

• 

Binadamu anabakia kuwa kiumbe mdadisi anayependa kupata habari,kujua kinachoendelea na pia hata kujua alichokifanya jirani yake jana usiku kama sio alichokifanya au anachokifanya mkuu wa nchi awapo mapumzikoni.

Nchini Tanzania, baada ya mapinduzi ya habari na mawasiliano,yaani baada ya kuvuka kile kipindi ambacho kulikuwa na magazeti matatu na kituo kimoja cha redio, paliibuka magazeti ambayo baadaye tumekuja kuyaita “magazeti ya udaku”. Hapo ndipo nasi tulipoingia rasmi kwenye mjadala wa; Je magazeti haya yana mchango gani katika jamii? Yanajenga au yanabomoa?

Hivi karibuni tulipata fursa adimu ya kufanya mahojiano na Abdallah Mrisho Salawi (pichani) Meneja Mkuu wa kampuni inayoongoza kwa uchapishaji wa magazeti ya “udaku” nchini Tanzania ya Global Publishers.Pamoja na mambo kadha wa kadha kumhusu yeye binafsi, Abdallah Mrisho anajaribu kueleza kuhusu kazi zao kama wanahabari na mchango wao au ubomoaji wao wa jamii.Hiyo itatokana na unavyoona wewe hasa baada ya kusoma alichotuambia Abdallah Mrisho.Pia anatoa ushauri muhimu kwa jamii hususani vijana kuhusiana na majanga kama umasikini,ukosefu wa ajira,ukimwi nk.Fuatana nasi katika mahojiano yafuatayo;

BC: Unaweza kutuambia historia ya maisha yako kwa kifupi? Ulizaliwa wapi,ukasomea wapi nk

AM: Nilizaliwa February 24, 1968, Bukene Tabora, nikiwa mtoto wa nne, kati ya watoto 9 wa Mzee Salawi. Katika familia yetu tulizaliwa jumla ya watoto 10, tupo hai 8, wavulana 5, wasichana 3. Wawili walishatangulia mbele ya haki.(Mungu awarehemu).

Elimu yangu ya msingi niliipata Bukene Primary School, kisha Ngerengere Secondary School ambayo inamilimilikiwa na Jeshi la Wanannchi wa Tanzania (JWTZ) kikosi cha anga, ambacho ndicho kinadili na ufundishaji wa marubani wa ndege za kivita nchini tanzania. Nilipata Stashahada yangu ya Business & Sales Letter Writing kutoka Chuo cha International Correspondence Schools cha Glasgow, UK mwaka 1993.

BC: Ilikuwa vipi na lini ulipoamua kuingia kwenye masuala ya habari?

AM: Kilichoniingiza kwenye media naweza kusema ni passion na niliingia kupitia mgongo wa picha. Nilianza kupenda kupiga picha tangu nikiwa shuleni ambako nilikuwa napiga picha wanafunzi wenzangu.Baadaye hata nilipoanza kazi niliendelea kupiga picha mitaani, kwenye harusi na function mbalimbali za kijamii.Huko ndiko nikajikuta pia napiga picha za habari ambazo ndizo zilizonikutanisha na GLOBAL PUBLISHERS LTD ambayo wakati huo ilikuwa ikijulikana kama SAFEGUARD TANZANIA LTD ikiwa ina magazeti mawili, Uwazi na Kiu na baadae Ijumaa.

Pamoja na kuwa hivi sasa ni Kiongozi wa kampuni, naendelea na upigaji picha kwani ndiyo fani yangu na nimeendelea kujifunza kila wakati na hata kusoma On Line sanaa mbalimbali za upigaji picha (Art of Photography). Chuo cha New York Institute of Photography (www.nyip.com) kimenipa maarifa mengi ya fani hii. Baadhi ya kazi zangu unaweza kuziona hapa: www.mrisho.faithweb.com. Pia nimejifunza na kusomea vitu vingi vya Information Technology (IT), Ghaphics na Printing.

BC: Kabla ya hapo uliwahi kufanya kazi zingine mbali na uandishi na masuala ya habari kwa ujumla?Ilikuwa ni kazi gani?

AM: Kabla na baada ya kuingia kwenye media nikiwa kama mpiga picha na mwandishi wa habari za entertainment, nilikuwa nafanyakazi katika kampuni nyingine. Nilianza kufanyakazi na Car & General Trading yenye ofisi zake pale Azikiwe Street karibu na Posta mpya nikiwa upande wa kiwandani kule Chang’ombe Industrial Area ambako nilikuwa Salesman. Jamaa walikuwa wana dili na utengenezaji na uuzaji wa matairi ya magari.

Hapo nilifanya kazi kwa miaka kama 5, (1990-95), then nikahamia kampuni ya K. J. Motors mwaka huo wa 95 mwishoni kama sikosei, enzi hizo kampuni hii ikiwa inaongoza nchini kwa uuzaji wa magari aina ya Isuzu, Honda na pikipiki aina ya Honda Excel na 110 trail. Niliajiriwa kama Administration Officer.

BC: Ni mwandishi gani wa habari, vitabu au makala nchini Tanzania anayekuvutia zaidi? Kwanini?

AM: Naweza kuonekana namfagilia bosi wangu, lakini nasema ukweli tu kwamba mwandishi wa vitabu anayenivutia ni Shigongo. Sababu kubwa ni jinsi ambavyo anaweza kuandika kila siku hadithi na zikapendwa na wasomaji wake. Hebu fikiria, Global ina jumla ya magazeti sita ambayo yanatoka kuanzia Jumatatu hadi Jumamosi na kila gazeti lina hadithi ya ukurasa mmoja.

Katika hadithi hizo, kila moja inajitegemea isipokuwa magazeti mawili ambayo hadhiti zake zinaendelea kutoka toleo moja hadi jingine. Lakini kikubwa zaidi ni jinsi anavyoweza kuandika mwendelezo wa hadhithi zake ambao unawavutia sana wasomaji wake.Huwa najiuliza points anapata wapi nashindwa kupata jibu. Naona ana kipaji cha kipekee ambacho si watu wote waweza kuwanacho. Amekuwa akiandika hadithi hizo karibu miaka kumi sasa na hajawahi kurudia stori.

Wengine wanafikia hatua ya kudai kuwa anatafsiri kutoka novel za kiingereza. Hana sababu ya kufanya hivyo.Shigongo ana kipaji cha kipekee cha kuandika hadithi, nafikiri comments za wasomaji wake wa kwenye mtandao zinajieleza, wanaguswa sana na hadithi zake! Mwenyewe hutuambia kuwa kuandika hadithi haoni kama ni kazi ngumu bali ni kama burudani, anapoandika huwa ana enjoy sana!

Kwa upande wa waandishi wa habari, naweza kusema navutiwa sana na Absolom Kibanda, mwandishi na mhariri mkuu wa gazeti la Tanzania Daima. Nampenda jamaa kwa sababu ana aina fulani ya uandishi wa habari ambao unatakiwa nchini, ujasiri usiokuwa na woga. Scoop ya kifo cha Balali nafikiri ni ushahidi tosha wa ujasiri wake!

Abdallah Mrisho(kushoto) akiwa na Marehemu James Dandu(katikati) na Erick Shigongo(kulia).Hii ilikuwa mwaka 2001.

BC: Ni jambo gani unalipenda zaidi kuhusu maisha yako kama kiongozi wa kampuni ya media na mwandishi wa makala? Lipi usilolipenda?

AM: Napenda ninapoona kampuni yangu inafanya jambo ambalo linainufaisha jamii na kubadilisha maisha ya mtu. Pia napenda pale ninapoandika makala zangu (You are what you eat) ambazo wasomaji zinawasaidia kuokoa maisha yao kwa kwa njia moja ama nyingine na kufikia hatu ya kunipigia simu na kuthamini kile nilichokiandika. Hali kadhalika kwa upande wa habari za entertainment, napenda kuandika kuhusu habari nikiwa wa kwanza kuiandika na kuihabarisha jamii.

Nikiwa kiongozi wa kampuni ya habari, sipendi kuona mtu yoyote anaonewa. Pale ninapoletewa malalamiko na msomaji akilalamika kuonewa kwa kuandikwa vitu ambavyo hakuvifanya huwa nakosa amani ndani ya nafsi yangu.Siku zote tunajaribu kusimamia uwazi na ukweli, sipendi kumuonea mtu kwa kitu cha uongo.

BC: Hivi sasa wewe ni meneja katika kampuni ambayo karibuni magazeti yote yanaandika habari ambazo zinazoitwa za “udaku”. Kwa maoni yako nini mchango wa magazeti ya “udaku” katika kuijenga au kuibomoa jamii?

AM: Mchango wa magazeti haya, ambayo sasa ‘yanaitwa magazeti pendwa’ kwa jamii ni mkubwa sana katika kuijenga zaidi kuliko kuibomoa. Japokuwa jamii hukasirika pale inapokosolewa kwa kwenda kinyume na maadili yetu na hiyo ni kawaida kwa binadamu yoyote, kwani siku zote ukweli huuma.

Lakini kupitia magazeti haya watu wameweza kupata haki zao walizokuwa wamedhulumiwa. Kupitia magazeti haya watu wamepona magonjwa ambayo yangeweza kuondoa uhai wao.Kupitia magazeti haya watoto wa masikini wengi wamesoma na wengine wanaendelea kusoma kwa kulipiwa ada na kampuni.Kupitia magazeti haya watu wengi wamepewa misaada ambayo imeweza kubadili maisha yao, achilia mbali familia za wafanyakazi na wauzaji wa magazeti haya walioko nchi nzima wanavyoweza kumudu maisha yao ya kila siku kwa kutegemea uuzaji wa magazeti hayo.

BC: Kama sikosei, changamoto moja kubwa ambayo lazima mnakabiliana nayo kila mara(kama sio kila siku) ni lawama mbalimbali kwamba magazeti ya udaku yanapotosha jamii hususani vijana na watoto na kwa maana hiyo kuchangia katika kuporomoka kwa maadili katika jamii. Je unakubaliana na lawama hizi? Kama hukubaliani unadhani lawama kama hizi zinatokana na nini?

AM: Hatukubaliani na lawama hizo.Kama nilivyojibu hapo juu, jamii wakati mwingine hukasirika pale inapokosolewa hata kwa jambo ambalo kweli imelifanya. Magazeti yetu siyo ya kulaumiwa, wanaopaswa kulaumiwa katika kupotosha vijana na watoto ni hao wanaofanya mambo yanayokwenda kinyume na jamii hadharani, kosa letu lisiwe kukemea kwa kuandika ukweli na kila mtu akajua.

Siku zote tunapoandika habari ya kashfa au ya ngono iliyofanywa na mwanajamii, hususan wale ambao wanaaminika kuwa ‘kioo cha jamii’, lengo letu huwa ni kukemea tabia hiyo ili isiendelee na kuonekana kama kitu cha kawaida kwa vijana na watoto.

Na hili limesaidia sana kubadili tabia za watu wengi, hasa hao ‘kioo cha jamii’ ambao zamani walikuwa wanaweza kufanya ufuska wa aina yoyote hadharani bila woga. Kadri siku zinavyokwenda ni wachache sana wanaodiriki kufanya ufuska hadharani kwani wengi wao wanaogopa kuumbuka.

Abdallah Mrisho(wa pili kutoka kushoto) akiwa na baadhi ya wasanii maarufu wa Tanzania.Hiyo ilikuwa ni mwaka 2003 wakati wa uzinduzi wa filamu ya GirlFriend jijini Dar-es-salaam.

BC: Wapenzi wa magazeti ya udaku wanasema wamechoka kila mara kusoma habari za kutishatisha tu kama vile mauaji,vita,njaa,ukimwi na mambo kama hayo.Wanaosema hivyo wanadai kwamba kuchoshwa huko ndiko maana magazeti ya udaku ni muhimu ili kubalance jamii.Unakubaliana na hoja hii? Kivipi?

AM: Unajua, hulka ya binadamu ni mabadiliko. Jambo lolote ukilifanya kwa muda mrefu litakuchosha.Hata kama ukiwa unapenda sana kula ‘chips kuku’, ukipata fursa ya kula chakula hicho kila siku bila kupumzika, kitakukinahi. Hivyo hivyo hata kwenye tasnia ya habari.Kama sisi tungeingia kwa staili ya uandishi ule ule ambao umekuwepo tangu mwaka 50, leo hii tusingefika hapa tulipo.Watu wanataka kusoma mambo yanayowahusu moja kwa moja, mambo yanayoathiri maisha yao ya kila siku.

Habari tunazoziandika zinatoka katika jamii ya mtanzania wa kawaida, ambao ndiyo wako wengi nchini. Jamii hii tunaiheshimu sana na siku zote tumekuwa mstari wa mbele kupigania haki zao pale wanapodhulumiwa.

BC: Kumekuwepo pia na shutuma mbalimbali kwamba waandishi wa magazeti ya udaku mara nyingi hawazingatii misingi na miiko ya uandishi wa habari.Unasemaje kuhusu shutuma kama hizo?

AM: Waandishi wetu ni kama waandishi wengine popote duniani.Suala la kuzingatia misingi na miiko au maadili ya uandishi wa habari ni la kwanza na ni la lazima. Mwandishi anayekiuka miiko yake kwa makusudi huyo hana nafasi kwetu.Uongozi umekuwa mkali sana katika hilo na wafanyakazi wengi wameshawahi kuchukuliwa hatua kali za kinidhamu,ikiwemo kufukuzwa kazi, pale wanapokiuka maadili ya kazi zao kwa uzembe. Hivyo ieleweke kwamba maadili yanazingatiwa, na wakati mwingine kuliko hata hayo yanayoonekana ‘serious’…

BC: Ni hatua gani mnazochukua mnaposhuhudia ukiukwaji wa maadili ya na sheria za nchi? Mfano mzuri ni mwaka jana mojawapo ya magazeti yako yalipoandika habari ya njemba mmoja kufumaniwa akiwa na mwanafunzi mdogo huko katika viwanja vya nane nane mkoani Morogoro. Huwa mnawaarifu polisi au mnatoa ushirikiano gani kwa wanausalama katika mambo kama hayo?

AM: Polisi siku zote wamekuwa marafiki zetu katika kupambana na uhalifu na maovu. Tumeshafanya operation nyingi kwa kushirikiana na jeshi la polisi nchini na kufanikiwa kuwakamata wahalifu wanaokiuka maadili ya kijamii na wale wanaofanya ufisadi wa aina mbalimbali.

Siku zote jamii imetufanya kuwa kimbilio lake pale inapokuwa inahitaji msaada wa haki.Matatizo mengine tunayoletewa kabla ya kuchukua hatua ya kuandika, hulishirikisha jeshi la polisi na kufanikiwa kuwanasa wahalifu ‘red handed’ na kesi zao kufikishwa mahakamani.

Katika siku za hivi karibuni, jamaa mmoja alitaka kumtapeli mfanyabiashara mmoja mamilioni ya shilingi kwa kutumia jina la IGP Said Mwema.Baada ya kupata taarifa hizo, waandishi wetu, wakishirikiana na askari wa TAKUKURU, waliandaa mtego na jamaa alikamatwa red handed akipokea minoti na kupigwa picha, kesi yake iko mahakamani na ushahidi unaomkabli ni mzito! Mifano iko mingi, nafikiri mingine umeisoma katika magazeti yetu.

Abdallah Mrisho(kushoto) akiteta jambo na Naibu Waziri wa Ulinzi,Dr.Emmanuel Nchimbi.

BC: Sina uhakika kama kampeni hii bado ipo lakini mwaka jana, kupitia kampuni yenu ya Global Publishers mliamua kutoa shilingi moja kwa kila gazeti linalonunuliwa kwenda katika mamlaka ya elimu Tanzania ili kuchangia watoto wasiojiweza na mayatima. Nini kiliwasukuma mfanye hivyo?

AM: Kama nilivyokwisha sema hapo awali, jamii imetufanya sisi kama ndiyo kimbilio lake pale inapokuwa na shida. Kwa kuwa watoto wengi wa watanzania wa kawaida wanasoma katika shule za serikali, shule ambazo zinakabiliwa na matatizo mengi ya madawati, vitabu, n.k, tuliona nasi tutoe mchango wetu kwa serikali kupitia mamlaka ya elimu Tanzania (TEA) katika kuboresha sekta hiyo, ili mwisho wa siku watoto wa masikini wasome katika mazingira mazuri.

Ahadi yetu bado inaendelea na mpaka sasa tumeshatoa karibu milioni 3 na Julai mwaka huu tunatarajia kukabidhi michango iliyosalia… na hizi ni pesa ya wasomaji wetu, kila anayenunua gazeti letu ajue ana shilingi yake inasaidia elimu mtoto wa mwenzie.

BC: Kwa maoni yako nini kifanyike ili kupunguza kasi ya kuongezeka kwa watoto wa mitaani na yatima wanaotokana na majanga ya kibinadamu kama ukimwi?

AM: Wanaume wasizae nje ya ndoa na ambao hawajaoa, wazae pale wanapokuwa tayari kufanya hivyo. Pia watu wazae idadi ya watoto wanaoweza kuwalea, si kila mtoto na riziki yake..hiyo haipo siku hizi!

BC: Nini tathmini yako kuhusu uongozi wa raisi wetu mheshimiwa Jakaya Kikwete. Je anaelekea kuishinda vita ya rushwa,umasikini,njaa na maradhi?

AM: Bado ana kazi ngumu. Dhamira yake ni nzuri, kweli anataka kumkomboa mlala hoi, lakini hana timu kamili yenye dhamira kama yake na hapo ndipo penye ugumu.Askari hata awe hodari vipi, lakini hawezi kupigana vita akiwa peke yake!

Abdallah Mrisho(kushoto) akiwa na Rais Mstaafu,Ali Hassan Mwinyi mwaka 1998.

BC: Una ushauri gani kwa vijana wa kitanzania kuhusiana na masuala kama ajira,ukimwi na maisha kwa ujumla?

AM: Tufanye kazi kwa bidii pale tunapozipata. Kila mtu mwenye nia ya kufanya kazi hakosi kazi, kwani kazi ni kazi mradi huvunji sheria na unapata mlo wako wa kila siku. Kikubwa ni kujitambua unatoka wapi, unaenda wapi na nini unatakiwa kufanya kufika huko uendako.

Ukimwi unabaki kuwa maneno hadi pale mtu anapoukwaa.Hivyo vijana wenzangu kama hawawezi kuchukua tahadhari yoyote sasa kwa kudhani wako salama, wajielewe wanatakiwa waishi vipi pale wanakapokuwa taabani kiafya, hilo ndiyo kubwa la kujiandaa nalo!

BC: Kuna lolote ambalo ungependa kuongezea ambalo hatujakuuliza?(Hapa unaweza kuweka suala zima la ninyi kuamua kuingia mtandaoni ili kuwafikia watu wengi zaidi nk)

AM: Hadhiti za Eric Shigongo zina wasomaji wengi sana nchini na hadithi zake ni ndefu sana kiasi kwamba unaweza kuwa nchini hadi unaondoka kwenda ughaibuni, hadithi inaendelea na ukiwa huko unatamani sana kujua mwisho wa hadithi fulani.

Tulipata maombi mengi na kilio hicho kutoka kwa wosomaji wa hadithi, njia pekee na ya kisasa kuwafikia wasomaji wetu popote walipo duniani, tukaona ni kuwa na mtandao(www.globalpublishertz.com) wenye kila kitu msomaji anachopenda kukisoma na kujua kuhusu Bongo.

Hivyo kuanzia July mwaka jana, tukaingia kwenye mtandao ambao umepokelewa vizuri na wasomaji wetu, ndani ya kipindi hicho kifupi kuna wageni waliotembelea hadi sasa karibu milioni 2 na idadi inaongezeka kila siku. Hivyo wanaopenda kuzisoma hadithi za Shigongo watembelee tovuti yetu ambapo pia watapata “udaku” na mambo mengine chungu mbovu.

BC: Asante sana Mrisho.Tunakutakia kila la kheri katika kazi zako/zenu.

NB: Abdallah Mrisho pia ni mwanablogu na blogu yake inapatikana kwa kutumia anuani hii; www.abdallahmrisho.blogspot.com

Be Sociable, Share!

•