Leo ni Siku ya Ukimwi Duniani. Ni siku ambayo hutumika kwa mengi ikiwemo kuwakumbuka wenzetu wote,ndugu,jamaa na marafiki ambao walishapoteza maisha kutokana na ugonjwa huu.

Pia ni siku ambayo inatumika kuungana,kuwatia moyo na kuwafariji wote ambao wameathirika na ugonjwa huu bila kusahau kuchangia kwa hali na mali katika vita ya kupambana na ugonjwa huu hatari.Ni siku muhimu ya kukumbushana kwamba Ukimwi bado upo na bado unaendelea kuteketeza maisha ya mamilioni ya watu na kwamba vita kubwa bado ipo mbeleni.

Siku ya Ukimwi ilianzishwa rasmi tarehe 1 Decemba mwaka 1988. Hivi sasa Shirika la Umoja wa Mataifa linaloshughulikia Ukimwi( UNAIDS) linakadiria kwamba hivi sasa kuna zaidi ya watu milioni 33.3 ambao wanaishi ya Virusi Vya Ukimwi duniani. Miongoni mwa hao,milioni 2.6 walipata maambukizi ndani ya mwaka 2009 tu!

Ndugu,jamaa,rafiki na msomaji wa BC,tunapoiadhimisha siku hii,tafadhali tukumbuke kwamba Tanzania bila Ukimwi inawezekana.Uwezekano huo,unaanzia kwangu,kwako,kwake na kwao.Play Your Part.

Be Sociable, Share!

• 

Jina la Madaraka Nyerere(pichani) sio geni miongoni mwa watanzania.Ukiachilia mbali ukweli kwamba yeye ni mtoto wa sita wa Hayati Baba wa Taifa, Mwalimu Julius Kambarage Nyerere (kitu ambacho bila shaka kinampa automatic celebrity status), yeye pia ni mwandishi,mfanyabiashara na mtu ambaye huwa hasiti kuelezea hisia zake kuhusu mambo mbalimbali iwe ni katika nyanja za kisiasa,kijamii na hata kiuchumi kila mara fursa ya kufanya hivyo inapojitokeza.

Mwaka jana mwezi wa nne(April) yeye na Jaffar Amin(mtoto wa Iddi Amin-Rais wa zamani wa Uganda) waliingia katika vitabu vya kumbukumbu vya wapenda amani duniani walipokutana kwa mara ya kwanza ikiwa ni ishara ya amani na usuluhisho barani Afrika na kwingineko.

Hivi karibuni nilipata nafasi ya kuzungumza naye kuhusu mambo kadhaa yakiwemo ya kifamilia na pia kupata maoni yake kuhusu mambo mbalimbali.Je,ni kwanini mpaka leo hii hajajiingiza katika masuala ya siasa au uongozi?Anamuelezeaje Hayati Baba wa Taifa kama baba yake na kama kiongozi?Ana ushauri gani kwa wapiga kura katika mwaka huu wa uchaguzi? Ana mtizamo gani kuhusu viongozi mbalimbali ambao hupenda kumuenzi Baba wa Taifa kwa maneno huku vitendo vyao vikiwa tofauti kabisa? Unataka kujua kwanini alipewa jina la “Madaraka”? Ana ushauri gani kwa vijana kuhusu suala zima la kujiletea maendeleo? Fuatana nasi katika mahojiano yafuatayo;

BC: Madaraka,asante sana kwa kukubali kufanya nami mahojiano haya. Kwa faida ya wale ambao hawawajui watoto wa Hayati Baba wa Taifa,Mwalimu Nyerere,nyumbani kwenu mmezaliwa watoto wangapi na wewe ulizaliwa lini,ukasomea wapi na kukulia wapi?

MADARAKA NYERERE: Tuko watoto nane. Mimi wa sita. Nimesoma shule

zifuatazo:

-Shule za msingi: Bunge, Forodhani, Arusha School, Isike (Tabora), Tarime.

-Sekondari: Mzizima, na Tambaza (Dar)

-Post-secondary: Shinyanga Commercial Institute

-Vyuo: Finafrica College (Milan, Italy); Algonquin College (Ottawa, Canada)

BC: Turudishe kidogo wakati wa utoto wako.Ni kitu au tukio gani unalolikumbuka zaidi kuhusu utoto wako?Na ulikuwa na ndoto za kufanya kazi gani utakapokua?

MADARAKA NYERERE: Sina tukio lolote kubwa ninalokumbuka la utotoni. Nahisi baada ya kuanza masomo ya biashara kuanzia kidato cha tatu, tayari nilianza kuwa na mawazo ya kuwa mfanyabiashara. Kabla ya hapo, sikumbuki kama nilikuwa na ndoto za kufanya kazi nyingine.

BC: Uliwahi kuelezwa kwanini ulipozaliwa ulipewa jina la Madaraka?Ilikuwaje kukua kama mtoto wa Rais au katika mazingira ya Ikulu na mambo kama hayo?

MADARAKA NYERERE: Nilipewa jina hilo kwa sababu nilizaliwa kabla ya Uhuru, 1960, wakati mamlaka ya utawala yalianza kukabidhiwa kwa wazalendo kwa ajili ya kujiandaa kwa Uhuru. Wakati huo iliundwa Serikali ya Madaraka, na ndiyo nikapewa hilo jina.

Tuliishi iliyopo Ikulu ya sasa kwa muda wa miaka michache baada ya Uhuru, lakini kwenye miaka ya katikati ya sitini, tulihamia Msasani. Mazingira ya kuishi Ikulu na Msasani hayakuwa na utofauti sana na jamii tuliyokuwa tunaiona kila siku tukienda shule, au tuliyotembela nje ya mazingira ya nyumbani, zaidi ya kwamba yalikuwa ni makazi ya rais na yalilindwa na askari.

Lakini hao walikuwa ni walinzi wa rais, na sisi hatukuwa na walinzi wowote. Lakini naamini hili ndiyo hali ilivyo hata mpaka sasa hivi kwa familia ya Rais, kuacha mke wa Rais.

BC: Pamoja na masuala ya uandishi,unajishughulisha na kazi zipi zingine?Je,na wewe ni mkulima kama alivyokuwa Hayati Baba wa Taifa?

MADARAKA NYERERE: Shughuli kubwa ninayofanya sasa hivi ni kuweka jitihada katika kutangaza Kijiji cha Butiama kama eneo la kumbukumbu inayomhusu Mwalimu Nyerere kwa kuwa ni sehemu aliyozaliwa, na ni sehemu ambayo amezikwa. Ninafanya jitihada pia ya kukusanya kumbukumbu zinazomhusu yeye. Najihusisha pia na kuendeleza utalii wa utamaduni katika kanda ya Ziwa, kwa mikoa ya Kagera, Mwanza, na Mara.

Aidha, kila mwaka (tangu 2008), hupanda Mlima Kilimanjaro kuchangisha pesa za hisani kusaidia masuala mbali mbali.

BC: Wewe ni mtu unayefuatilia kwa karibu masuala ya mila na desturi.Nimekusoma mara kwa mara ukielezea habari mbalimbali za kimila na kitamaduni hususani za kabila lenu la Wazanaki.Sasa kwa upande mwingine,vijana wengi wa siku hizi hawataki sana kusikia au kuzingatia masuala ya mila na tamaduni.Wanadai mambo hayo yamepitwa na wakati.Unasemaje kuhusu mtazamo huo wa vijana?

MADARAKA NYERERE: Jamii yoyote isiyoweka jitihada ya kulinda na kudumisha utamaduni wake inatoa fursa kwa tamaduni nyingine kuchukuwa nafasi na kuweka ushawishi katika mawazo ya vijana wake.

Mimi naamini kuwa kushabikia tamaduni nyingine kuna hatari ya kutufanya tusiwe na misimamo thabiti ya kutetea yale ambayo yanaweza kuwa na manufaa kwetu. Ukishakuwa huna utamaduni wa kutetea, unakuwa tayari kupokea lolote linalokuja toka kwenye tamaduni nyingine, na siyo yote yanayotoka nje yana manufaa kwetu.

Hao vijana ambao wanaona kuwa utamaduni umepitwa na wakati watakuwa tayari wamekumbwa na hilo tatizo.

Madaraka Nyerere(mtoto) akimuangalia baba yake,Mwalimu Nyerere,akipiga ngoma.

BC: Umewahi kuandika mahali kwamba mara nyingi watu hutegemea kwamba mtoto wa mwanasiasa,tena wa mwanasiasa mashuhuri na maarufu kama Mwalimu,na yeye atakuwa mwanasiasa.Kwa bahati nzuri au mbaya wewe mpaka hivi sasa umejiweka pembeni kidogo na siasa.Unaweza kuniambia sababu zako za msingi hasa za kutojishirikisha na siasa kama ambavyo watu wengi wangetegemea?

MADARAKA NYERERE: Tatizo kubwa ninaloliona kwenye siasa za Tanzania ni kuwa kuna utaratibu wa kutokuelezana ukweli, hata kama yule anayepaswa kuelezwa ukweli anafanya mambo ambayo yanakiuka maadili ya uongozi, au yanapingana na azma ya kuleta maendeleo kwa watu, na wakati mwingine kuwa hata ni mambo ambayo yanahatarisha maslahi ya vizazi vijavyo.

Ukisema ukweli, unajenga uhasama na viongozi wenzako. Siamini kama maendeleo yanaweza kuja bila kukubali utaratibu ambao Mwalimu Nyerere aliuzungumzia wa “kujisahihisha.” Na mtawezaje kusahihishana kama hamuelezani ukweli?

Inawezekana binadamu wengi tuko hivyo, yaani hatupendi kukosoa wenzetu mara kwa mara. Na mimi sidhani kama niko tofauti sana, isipokuwa najifahamu vizuri kuwa naweza kujizuwia kusema jambo kwa muda mrefu, lakini kuna wakati lile ambalo nimelikalia kwa muda mrefu litatoka tu, halafu nitajenga uhasama na viongozi wenzangu, iwapo nimeingia kwenye uongozi.

BC: Katika utafiti wangu wakati naandaa maswali kwa mahojiano haya,nimegundua kwamba wewe ni mpenzi mzuri wa muziki.Kitu ambacho sikuweza kugundua ni aina ya muziki uipendayo,wanamuziki uwapendao .Unaweza kunitatulia kiu yangu ya kujua vitu hivyo?

MADARAKA NYERERE: Ni kweli napenda muziki, lakini siwezi kusema kuwa ni muziki wa aina moja tu ambao napenda; napenda miziki ya aina nyingi. Mimi naamini kuwa ukisikiliza muziki wowote kwa muda, utasikia kitu kinachopendeza tu. Miziki mingi ambayo naipenda ni ya zamani. Kwa hiyo kwa upande wa Tanzania nasikiliza sana Zilipendwa, na pia Zilipendwa za Congo ya kina Rochereau, na Lwambo. Lakini hata baadhi ya miziki ya kizazi kipya ya Tanzania napenda kusikiliza.

Kwa kipindi kisicho cha zamani sana napenda sana miziki ya Orchestra Maquiz du Zaire, Dk Remmy Ongala, na baadhi ya miziki ya Mlimani Park Orchestra.

Kwa nje, napenda miziki ya UB40 na Bob Marley, na wanamuziki wengine kama Ray Charles na Stevie Wonder.

BC: Tukiwa bado kwenye suala hilo hilo la muziki,kumekuwepo na mabadiliko makubwa katika sanaa ya muziki nchini Tanzania.Kulikuwa na miziki ambayo leo hii tunaiita “zilipendwa” ,kukawa na mfumuko mkali sana wa miziki ya ki-Congo na hivi sasa tunayo Bongo Fleva au muziki wa kizazi kipya.Nini mtazamo wako katika safari hii ya mabadiliko?Ungependa labda kutoa ushauri gani kwa wanamuziki vijana wa leo?

MADARAKA NYERERE: Mabadiliko makubwa ya mzuiki wa sasa yanasukumwa na teknolojia. Nakubaliana na msimamo ambao alitoa Waziri Ally hivi karibuni, mwanamuziki wa bendi ya Njenje ambao aliutoa kwenye mahojiano, kuwa tukiendelea na mtindo huu, baada ya muda si mrefu (yeye alisema miaka kumi), hatutakuwa na wanamuziki tena hapa Tanzania.

Wanamuziki wengi wa sasa, wana uwezo wa kuandika mashairi tu, lakini hawana uwezo wa kupanga mpangilio wa ala kwa sababu hawajajifunza muziki. Kuendeleza muziki kunahitaji kusomea muziki (kusoma na kuandika muziki) pamoja na kujifunza kupiga ala.

Ushauri kwangu kwa wanamuziki vijana ni waanze kusomea muziki.

BC: Umeshatembelea nchi kadhaa ulimwenguni zikiwemo nyingi za barani Afrika.Kwa uzoefu wako kutokana na safari hizo,unadhani bara la Afrika linakabiliwa na changamoto zipi ambazo zinafanana kutoka nchi mpaka nchi na unaweza kutoa ushauri gani katika mbinu au njia za kukabiliana na changamoto hizo?

MADARAKA NYERERE: Changamoto zinafanana kwenye nchi nyingi. Kukuwa kwa umasikini kutokana na wakazi wengi wa nchi hizi kuendelea kuishi maisha duni kutokana na uwezo mdogo wa Serikali zao kuleta mabadiliko katika maisha yao, au kutokana na uongozi mbovu, au kutokana na sera zisizozingatia mahitaji ya wengi.

Utegemezi ni kikwazo kikubwa cha kuleta mabadiliko na maendeleo kwa wananchi; utegemezi wa sera, wa fikra na wa nyenzo za kuleta maendeleo. Kwa kuwa tuna utegemezi wa sera, hata zile rasilimali ambazo tunazo na ambazo zingetusaidia kupunguza kuomba omba, tunazibinafsisha kwa kufuata sera za wengine na matokeo yake tunajipunguzia uwezo wa kujitegemea.

Sioni njia ya kujikwamua na changamoto hizi kwa kuendelea kuwa wategemezi.

BC: Umepanda Mlima Kilimanjaro mara kadhaa sasa(kama sikosei mara mbili).Ingawa wewe umepanda mlima kwa sababu za NGO,.Utalii wa ndani.Ungemshauri nini mtu ambaye leo hii anapanga au anatamani kupanda Mlima Kilimanjaro?Zaidi ungemshauri nini katika maandalizi ya kuupanda mlima huo?

MADARAKA NYERERE: Ingawa kupanda Mlim Kilimanjaro siyo gharama ndogo kwa Watanzania waliyo wengi, ni jambo ambalo nashauri wote wenye uwezo (wa fedha) wajaribu hata kwa mara moja. Fedha peke yake haziwezi kukufikisha kileleni, kwa sababu hata Bilionea Abramovich hakuweza kufika kileleni alipojaribu kupanda Kilimanjaro.

Hata hivyo, kwa mtu anayekusudia kufika kileleni, inahitaji kufanya mazoezi ya kuongezea mwili uwezo wa kuhimili kutembea kati ya saa 6 – 8 kila siku kwa kati ya siku 6 hadi 8. Zaidi, ni uwezo wa kufanya hivyo katika mazingira ambayo hewa ya oksijeni inapungua kadri unavyozidi kupanda juu kutoka usawa wa bahari.

Zoezi lolote linaloongeza ‘fitness’ linasaidia. Inahitaji kufanya mazoezi hayo kwa muda usiyopungua miezi mitatu. Pia ni muhimu kufanya mazoezi ya kutembea (kama ni nje, au kwenye ‘treadmill’) kwa muda mrefu (labda mara moja kwa juma).

Jambo kuu linalosababisha wengi kushindwa kufika kileleni ni uwezo mdogo wa mwili kuhimili upungufu wa oksijeni, mpandaji anavyozidi kukaribia kileleni. Hata hivyo, njia ambayo nimekuwa naitumia mimi (Lemosho route) inasaidia sana kuuzoesha mwili hali ya kuwa mlimani na kuhimili upungufu huo wa hewa safi.

Jambo la mwisho muhimu ni kuwa na ari ya kufanikiwa; kutokubali kushindwa.

Madaraka Nyerere(kulia) akiwa katika kilele cha Mlima Kilimanjaro.Mwenzake ni Gerald Hando,mtangazaji wa Clouds FM

BC: Kwa muda sasa umekuwa ukiandika masuala kadha wa kadha katika blog yako.Nini kilikuvutia katika kuanzisha blog?Unazungumziaje zana hizi mpya za habari na mawasiliano? Je,kwa mtazamo wako,watanzania tunazitumia ipasavyo katika kupashana habari na kuwasiliana?

MADARAKA NYERERE: Sababu kubwa iliyonisukuma kuanzisha ‘blog’ ni kuhabarisha yale ambayo nafikiri yanaweza kuwa ya manufaa kwa wengine, au yanayofurahisha kwa namna fulani. Pia, nakusudia kuwa mwandishi katika siku za usoni (labda wa vitabu), na nilisoma mahali kuwa kila mwandishi anahitaji kujitangaza kupitia njia hii.

Naamini ‘blog’ ni zana nzuri ambayo inampa kila mtu fursa ya kusema lile ambalo lipo kichwani mwake. Kwa maana nyingine, inapanua wigo wa kupata mawazo mbadala ambayo hayatolewi kwa kuzingatia vizingiti ambavyo vinaweza kukabili baadhi ya vyombo vya habari.

Hata hivyo, kuna baadhi ya Watanzania wanatumia ‘blog’ kuandika maoni au habari ambazo zinakiuka maadili ya uandishi, na badala ya kuwa jambo zuri linakuwa jambo ambalo linaleta athari kwa wale wanaoandikwa vibaya.

Madaraka Nyerere(kulia) akiwa na Jaffar Amin walipokutana mjini Musoma mwaka jana.Ukitaka kusoma alichoandika Madaraka kuhusu mkutano huo,bonyeza hapa.

BC: Mengi yameshaandikwa kuhusu historia ya Mwalimu Julius Nyerere.Lakini mpaka hivi leo bado hakuna Biography ya Mwalimu ambayo imeandikwa aidha na yeye mwenyewe au mtu wa karibu sana na Mwalimu.Mtu kama wewe hivi.Je,unadhani kwanini mpaka leo hakuna biography ya Mwalimu?Una mpango wowote wa kuandika kitu kama hicho?

MADARAKA NYERERE: Nafikiri kuandika kitabu juu ya maisha ya Mwalimu ni kazi ambayo siyo rahisi iwapo kusudio ni kukiandika kwa ukamilifu, kwa sababu maisha yake yamegusa maeneo mengi ya historia, siyo ya Tanzania tu bali hata ya baadhi ya nchi za Afrika, hasa wakati wa harakati za vita vya ukombozi wa nchi hizo zilizoshirikisha pia mchango mkubwa wa Tanzania. Labda ugumu huo ndiyo unasababisha kuwa hakijaandikwa mpaka sasa.

Sijui kama nina uwezo wa kufanya hivyo peke yangu, lakini nadhani ni jambo ambalo napswa kulitafakari.

BC: Kama mtoto wa Rais,umepitia mambo mengi,kuona mengi. Kwa maneno yako mwenyewe,unamuelezeaje baba yako? Au tuseme Mwalimu Nyerere tuliyekuwa tunamuona kwenye majukwaa ya siasa alikuwa ana tofauti gani anapokuwa nyumbani?

MADARAKA NYERERE: Ni swali zuri. Sisiti kusema kuwa Mwalimu aliyesimama jukwaani hakuwa anafanya maigizo; alikuwa ni mtu yule yule ambaye aliporudi nyumbani. Maadili yale aliyoyazingatia katika uongozi wake, aliyaishi pia.

BC: Huu ni mwaka wa uchaguzi.Hivi sasa kampeni mbalimbali za kisiasa ndio zimeshamiri.Nikikupa nafasi ya kumsaidia mwananchi wa kawaida katika uamuzi wake wa kumchagua kiongozi bora ungemwambia nini mwananchi huyo?

MADARAKA NYERERE: Mimi naamini kila mpiga kura anaweza kuamua ni kiongozi gani atamfaa katika uongozi kwa kuangalia mazingira anayoishi, mahitaji yake, na kuangalia sera ambazo anaamini zitaleta mabadiliko katika maisha yake, na mwisho kuchagua yule mgombea ambaye anaamini atakabili changamoto ambazo zitaleta maendeleo kwake.

Tatizo ni kuwa inawezekana kabisa kuwa hata wale wagombea watakaojitokeza hawatakuwa wamefikia kiwango ambacho mpiga kura anatarajia kutoka kwa kiongozi wake.

BC: Chaguzi za kisiasa nchini Tanzania huenda sambamba na kutajwa sana kwa jina la Hayati Baba wa Taifa.Takribani kila kiongozi hujaribu kujihusisha na jina lake kwa namna moja au nyingine huku wengi wakijinadi kwamba wanamuenzi Baba wa Taifa kwa jambo moja au mawili.Unaongeleaje suala au tabia hizo za wanasiasa?

MADARAKA NYERERE: Kila mwanasiasa analenga kujenga umati wa watu ambao watamkubali na kumpigia kura. Naamini kuwa bado mpaka sasa hivi, kuna wapiga kura wengi wanaamini kuwa Mwalimu Nyerere alikuwa ni kiongozi ambaye alikusudia kwa dhati kuleta maendeleo kwa Watanzania wote. Kwa hiyo, si ajabu kuona kuwa wapo viongozi ambao wanao msimamo huo huo kuhusu Mwalimu Nyerere na wanasema hivyo wakati wa kupiga kampeni ili wapate kukubaliwa na baadhi ya wapiga kura.

Hata hivyo, si ajabu kuwa wapo viongozi wengine ambao watakaojitokeza kusema wanamuenzi Mwalimu Nyerere wakati wanayofanya ni tofauti kabisa na yale aliyoyasimamia Mwalimu. Huu ni utapeli. Sio lazima kukubaliana na kila kitu Mwalimu Nyerere alichosimamia. Kiongozi wa kweli ni yule ambaye ataonyesha msimamo wake waziwazi, na siyo kutoa picha kuwa ni wa aina moja kumbe wa aina nyingine.

BC: Nimeona katika blog yako mara kadhaa umekuwa ukiwakaribisha wageni wanaotaka au wanaokuwa wamekuja kuona kaburi la Hayati Mwalimu Nyerere.Je,kuna utaratibu maalum ambao sharti mtu aufuate endapo anataka kuja kuliona kaburi?

MADARAKA NYERERE: Kila mtu yuko huru kutembelea Butiama. Haihitaji kupata ruhusa yoyote. Anapofika Butiama anaweza kutembelea Makumbusho ya Mwalimu Nyerere, kaburi lake, na baadhi ya nyumba zake. Kwa anayehitaji maelezo zaidi, anaweza kuwasiliana nami kwa barua pepe kupitia: madaraka.nyerere@gmail.com

BC: Una ushauri gani kwa vijana wa ki-Tanzania katika suala zima la kujiletea maendeleo yao binafsi na pia ya taifa?

MADARAKA NYERERE: Narudia maneno ambayo Mwalimu aliyasema kuwa kufanya kazi kwa bidii na maarifa ni muhimu sana. Maarifa ya leo hii yanajumuisha matumizi makubwa ya teknolojia zinaozohusiana na kazi na changamoto zinazotukabili.

Serikali ina jukumu la kuweka mazingira mazuri pia ili wale waliyokuwa tayari kufanya kazi ili kuleta mabadiliko kwenye maisha yao waweze kufanya hivyo kwa mafanikio. Lakini, kazi na maarifa peke yake haitoshi kwa sababu hata yale mazingira ambayo Serikali itaweka yatahusisha sera na mfumo ambao Serikali inaona ndiyo unafaa kwa wakati huo.

Swali kubwa ambalo wakati wote linahitaji majibu ni: sera zinazosisitiza soko zaidi ya jamii zinaweza kuleta maisha bora kwa kila mtu kwa mafanikio zaidi kuliko sera ambazo zinaweka mkazo kwenye masuala ya jamii?

Baadhi ya tafiti zinaonyesha kuwa sera za soko ambazo zimekuwa kama dini duniani kote zimeleta umasikini kwa watu wengi zaidi duniani, ingawa zimefanikiwa kutajirisha watu wachache kwa kiwango cha juu sana.

Vijana waache kuwa walalamikaji kuhusu Serikali na viongozi wao, na waanze kuchukuwa jukumu la kuhakikisha kuwa maamuzi yanayofanywa na Serikali na viongozi wao yataleta manufaa kwa wote, na kwa vizazi vijavyo.

BC: Wewe na mke wako mna watoto wangapi? Majina yao?

MADARAKA NYERERE: Tuna watoto watatu: Julius, Julia, na Helena.

BC: Madaraka,shukrani sana.Nakutakia kila la kheri katika kazi zako

MADARAKA NYERERE: Asante Jeff

Ukitaka kuperuzi kwenye blogs za Madaraka Nyerere Bonyeza Hapa kwa Blog ya Kiingereza

Bonyeza Hapa kwa Blog ya Kiswahili.

Be Sociable, Share!

• 

Alicia Keys,a Grammy Award Winner,is hiring. She is looking for a Superwoman to work with her as a blogger for her new site,new venture where she hopes to empower and connect women and help them find their inner “superwoman”.

The new website is, IAAS.com and it is named after one of her most popular song “I Am a Superwoman“. Alicia hopes that through internet she can bring women together to share dreams,goals,struggles and advice. Her dream is to create a neighborhood and an online community dedicated to women.

Are you a superwoman? Do you wanna work with Alicia Keys. Click here to apply.

Be Sociable, Share!

• 

Miongoni mwa mambo mapya katika kongamano hilo,ilikuwa ni pamoja na kualika rasmi waandishi na hususani waandishi wa mitandaoni kama vile bloggers.Almaarufu Issa Michuzi alikuwa miongoni mwa sio tu waalikwa,bali pia watoa mada(mahojiano naye kuhusu uzoefu wake kufuatia kongamano lile yapo mbioni). Mwandishi mwingine mkongwe na blogger aliyekuwepo katika mkutano huo ni Freddy Macha. Mbali ya kuwa mwandishi,blogger,Freddy pia ni mwanamuziki na muelemishaji hususani katika masuala ya afya na michezo ya kujihami au kujikinga(self-defense). Unaweza kusoma mahojiano yangu ya kina naye kwa kubonyeza hapa na hapa.

Baada ya kongamano lile,Freddy aliketi chini na kuandika  kuhusu yaliyojiri kwenye kongamano na zinapoelekea zama hizi za tekinolojia ya habari na mawasiliano. Bonyeza hapa usome alichokiandika Freddy Macha. Usisahau pia kusoma makala zake katika gazeti la Mwananchi kila Jumapili.

Be Sociable, Share!

• 

Mara ya kwanza tuliwasiliana mwaka jana.Akanieleza mipango yake,ndoto zake na mikakati aliyonayo katika kutimiza ndoto zake.Kama ilivyokuwa kwa mamilioni ya watu ulimwenguni, Babu Sinare ambaye kisanii anajulikana kwa jina la Albino Fulani, alikerwa na kuhuzunishwa na mauaji ya watu wenye ulemavu wa ngozi(albino) kwa imani za kishirikina. Kwake yeye,ilikuwa ni kama vile wametonesha kidonda ambacho alidhani kilishapona kwani Babu Sikare ni albino pia.

Miongoni mwa mipango yake ilikuwa ni pamoja na kuanzisha NGO yake ambayo italenga kusaidia albino wengine.Kupitia muziki wake,aliahidi kwamba atazidi kukemea mauaji ya albino.Hakuwa anatania.Alianzisha shirika lisilo la kiserikali na kuliita Afro-Bino. Matunda ya shirika hilo yameanza kuonekana.

Pichani juu ni Babu Sikare(kushoto) akimkabidhi Mkurugenzi wa Huduma za Hospitali kutoka Wizara ya Afya, Dr. Magreth Mhando (kulia) karatasi yenye maelekezo ya msaada wa mafuta ya kuzuia ngozi isiharibike na jua kwa ajili ya watoto wenye ulemavu wa ngozi Tanzania (Albino) yenye thamani ya dolla 1,500. Katikati ni Kaimu Mkurugenzi Idara ya Ustawi wa Jamii Bi. Magreth Njimba.

Kutoka moyoni,naomba kumpongeza Babu Sinare na shirika zima la Afro-Bino.We salute you and we support you.

Albino Fulani anatamba pia na wimbo wake Barua Kwa Mama.Bonyeza hapa kuusikia.

Be Sociable, Share!

• 

Nchi yetu imepitia katika awamu nne mpaka sasa katika siasa na uongozi. Kwanza ilikuwa enzi za Mwalimu Nyerere ambazo wengine hupenda kusema enzi za “mchonga”. Kisha ikaja awamu ya pili chini ya Mzee Mwinyi ambaye alikuja kujulikana sana kama “Mzee Ruhksa”. Kisha akaja Mheshimiwa Mkapa ambaye alipewa jina la “ukapa” kwani alipoingia madarakani, na shilingi ikapotea mifukoni mwa watu. Tupo katika enzi za JK. Bado sijajua akimaliza muda wake zitaitwaje enzi zake.Tusubiri.

Wakati sote tunakubaliana kwamba awamu zote ni muhimu kwa maendeleo kamili ya nchi,bila shaka tunakubaliana pia kwamba awamu ya pili,ya Mzee Mwinyi,ilifungua milango mingi sana. Hapo ndipo vitu kama vituo vya televisheni,vituo vya redio vya FM,biashara za nje na ndani,zilikuja kwa kasi.Enzi za mageuzi.

Kufunguka kwa milango hiyo kulitoa pia nafasi kwa vijana kuonyesha vipaji vyao ambavyo hapo nyuma vilikuwa vimejificha bila sehemu ya kufichuliwa. Tukaanza kupata vijana watangazaji.Tukapata vijana wenye vipaji vya kisanii kama vile tunaouita “muziki wa kizazi kipya” hivi sasa. Tukapata wazalishaji muziki (producers). Watangazaji wapya wakaambatana na wale “wakongwe” kutoka vituo kama Radio Tanzania na kutupatia ufanisi na ushindani katika masuala ya utangazaji ambao haukuwepo kabla ya hapo.

Miongoni mwa vijana waliopata fursa ya kuingia katika fani na kuonyesha vipaji vyao ni Sunday Simba Shomari.(pichani). Ghafla maisha yakabadilika,enzi za AM zikazibwa na FM.Soko la muziki wa kizazi kipya likaanza kukua. Majumba ya sinema yakatoweka.Hakuna wateja. Kila mtu yupo nyumbani akikodolea macho luninga yake. Kama kwenu hakuna TV basi unajongea kwa jirani. Muziki wa kimataifa,soka la kimataifa yakiwemo kama mashindano ya kombe la dunia yakawa ni mambo ya kawaida.

Nini kiliwasukuma vijana kama Sunday Shomari kuingia katika fani ya utangazaji wa radio na televisheni? Ilikuwaje enzi hizo ukizingatia kwamba wengi wao walikuwa hawana uzoefu katika masuala hayo? Na je anazungumziaje safari yake kutoka Radio One/ITV mpaka Voice of America alipo hivi sasa? Nilimtafuta Sunday na kufanya naye mahojiano yafuatayo;

BC: Sunday karibu sana ndani ya BC.Tunafurahi kuwa nawe hapa.Mambo yanakwendaje?

SS: Mambo safi tunamshukuru Mungu.

BC: Labda bila kupoteza muda,kwa faida ya wale ambao wanakufahamu kwa sura na jina tu,unaweza kutupatia japo kwa kifupi tu historia ya maisha yako?

SS: Mimi ni mzaliwa wa Dar-es-salaam na mwenyeji wa Tanga. Nimepata elimu ya msingi Arusha School na Muhimbili. Elimu ya sekondari Forodhani na Al-Muntazir.Halafu nimefanya kazi na Dr.Jane Goodall Institute kabla ya kujiunga na ITV na Radio One. Baadaye nikajiunga na Chuo Cha Uandishi wa Habari (TSJ) kwa kozi fupi ya uandishi. Kisha nilikuja hapa Marekani kwa kozi nyingine fupi ya uandishi wa TV kabla ya kurudi tena Tanzania na kuendelea na masomo yangu ya juu ya uandishi hapo TSJ.

Wakati huo huo nikiendelea na kazi hatimaye nilitoka kwenye uandishi nikaingia Shirika la Ndege la Alliance kabla ya kuja tena Marekani kujiendeleza kielimu na kutafuta maisha mengine. Na hivi sasa naendelea na shahada ya mawasiliano katika Chuo Kikuu Cha Maryland.

BC: Ilikuwaje ukaingia kwenye fani ya utangazaji? Nini kilikushawishi au nani alikuvutia katika fani ya utangazaji?

SS: Nilikuwa napenda kuwaona watangazaji wengine wa wakati huo hasa Tumaini Meshack ambae nilisoma nae sekondari na alikuwa ITV kwa wakati huo akifanya kipindi cha watoto. Mzee wa Macharanga Charles Hillary, Mikidadi Mahmud a.k.a Brother Micky Uncle J Nyainsangah, Suzan Mungi na wengine lakini niliingia baada ya kumaliza kidato cha sita na wakati huo IPP MEDIA walitangaza nafasi za kazi basi nikajaribu na kufanikiwa kuingia siku moja na Mike “Magic” Muhagama na Peace Kuyamba a.k.a Peace K.

BC: Turudishe nyuma kidogo.Miaka ileee…kipindi unaanza kutangaza.Unakumbuka ilikuwaje siku ya kwanza uliporusha matangazo kwa mara ya kwanza kabisa.Ulijisikiaje ulipoambiwa kwamba 1,2,3 go.You are now “live”?

SS: Nilikuwa na hamasa kubwa sana na moyo ulikuwa ukipiga kwa kasi na wakti huo huo nilisikia raha moyoni ambayo siwezi kuielezea na sitasahau Aboubakar Liongo alinipa moyo sana na ushauri bila kumsahau Master T .

BC: Kwa watu wengi,kuanza kazi mpya huwa inakuwa kazi ya ziada.Kuzoea mazingira mapya,watu wapya,taratibu mpya za kazi nk huweza kuwa mambo magumu kwa baadhi ya watu.Kwa upande wako ilikuwaje hususani ulipoanza kazi pale ITV na Radio One miaka ile ambapo kila mtu alikuwa anapatizama? Ulikumbana na “kasheshe” zozote?

SS: Nyingi tu kama ulivyosema kila kazi ina kasheshe zake hasa kubwa ilikuwa kipindi kinaitwa kumepambazuka inabidi uamke alfajiri saa 11 ili uweze kuwahi kufungua kituo,mengine ni mambo ya utendaji kuelewana na wenzako kazini na kutofanya makosa lakini nashukuru watu niliofanya nao kazi walikuwa na usaidizi na upendo wa hali ya juu na nilikuwa tayari kujifunza kwao kama vile Blandina Muongezi a.k.a Anti Ndina.

BC: Kazi ya utangazaji huendana na umaarufu mara nyingi.Kama ujuavyo,umaarufu sio lelemama.Una raha na karaha zake na kimsingi ni mabadiliko makali ya kimaisha.Unatoka kuwa mtu asiyejulikana na yeyote na kuwa mtu unayejulikana na wengi.Kwa upande wako mabadiliko hayo yalikuja vipi na ulikabiliana vipi na changamoto za kuwa mtu maarufu?

Ni nzito sana na inatahitaji umakini wa hali ya juu nilikutana na mengi kila nililokuwa nafanya ni hadithi kwa wengine wakati mengine si ya kweli na wakati huo huo tukienda kwenye madansi nasikia jina linaimbwa na maband kwa mfano “Diamond Sound” kwahiyo unajikuta huwezi kuwepo mahali bila watu kukuzungumzia wakati mwingine inakera au usifanye jambo lolote ni hadithi mtaani. Na wakati mwingine unapata maadui ambao hawapendi tu kukuona bila sababu yeyote.

Kwahiyo nilijikuta kila ninapoenda nina maswali ya kujibu si kwa watoto au wazee na hasa wengi wao wakitaka kujua mimi na Monica tuna nini kinachoendelea lakini nikiwaambia uhusiano wetu ni wa kazi tu imekuwa ngumu watu wengi kuamini mpaka leo lakini nilijitahidi kuwa makini na maisha yangu. Na nawashukuru wazazi wangu kwa kunipa msingi bora wa maisha na Mungu awalaze pahali pema peponi Amen.

Sunday Shomari akiwa na mwanamuziki maarufu kutoka nchini Marekani,Avant.

BC: Na je huwa inatokea ikafikia mahali ukakubaliana na hali halisi kwamba mimi ni maarufu na hivyo mengi yanaweza kusemwa juu yangu,ya uongo na ya ukweli? Na pia je huwa unajisikiaje hivi leo ukiona picha yako kwenye gazeti fulani,televisheni nk?Big deal?

SS: Hapana si hivyo hata kidogo kwa sababu kwa kweli ni mambo ya kawaida mi ni mwandishi kwahiyo najua kila chombo kinatafuta habari na najitahidi kutojali nini kimezungumzwa mradi najua maisha yangu yanakwendaje.

BC: Hivi sasa upo nchini Marekani,Voice of America.Ilikuwaje mpaka ukafika hapo?Na unaonaje mabadiliko ya kiutendaji kazi hapo nchini Marekani ukilinganisha na nyumbani Tanzania?Kuna yepi ambayo unaweza kusema kule nyumbani tunaweza kujifunza ili kuboresha utendaji kazi?

Nimepitia sehemu nyingi tu za kazi kabla ya kufikia hapa na kutokana na uzoefu na masomo yangu nikapata nafasi ya kuingia hapa nashukuru lakini nikilanganisha na nyumbani hapa nimejifunza mengi sana kama mtangazaji unatakiwa kuwa na uwezo wa kufanya vitu vingi ikiwa ni pamoja na kuandika habari, kutafsiri, kufanya usaili, kuhariri , kusoma kwa Kiswahili fasaha na pia kutumia teknolojia mpya katika vyombo vya habri ikiwa ni kompyuta, mtandao , vifaa vya kisasa n.k. Nyumbani tulivyokuwa tukitangaza kwa wakati huo ukiwa mtangazaji basi ni hivyo tu huandiki habari wala kwenda kutafuta habari mitaani au ukiwa mpiga picha ni hilo tu kwani wapo watu wa kuandika wewe ni kusoma tu, na pia ukija kwenye masuala ya studio si lazima ufanye uhariri lakini hiyo ni wakati huo najua sasa kuna mabadiliko ambayo siwezi kuyachanganua. Kwa hiyo kwa ujumla utangazaji wa hapa unahitaji uwe muandishi kwasababu hii ni radio ya kimataifa.

BC: Na kwa wale ambao hawajui ratiba ya matangazo ya Voice of America kwa wakazi wa Afrika Mashariki,wanaweza kuyasikiliza wapi,katika vituo gani,muda gani na mara ngapi kwa siku?

Matangazo yapo kwenye vituo mbali mbali Afrika mashariki ikiwa ni pamoja na Radio Tumaini Daressalaam Tanzania na Radio Free Afrika katika eneo zima la maziwa makuu, Citizen Radio kote nchini Kenya, Radio yetu ya VOA 107.5 FM Nairobi, Baraka FM Mombasa, Radio Ngoma Afrika Bujumbura Burundi, Raga FM DRC na Coconut 100.9 FM Zanzibar. Matangazo yapo ya alfajiri na jioni saa moja na nusu saa za Afrika Mashariki na saa kumi na mbili na nusu jioni saa za Afrika ya kati. Wakati asubuhi ni saa kumi na moja alfajiri na kumi na mbili. Na wale walioko hapa Marekani na sehemu nyingine duniani wanaweza kuingia kwenye mtandao www.voanews.com/swahili masaa 24 na pia tupo kwenye face book Voaswahili unaweza kutoa maoni na kutuma maswali pia.

BC: Natambua kwamba wewe ni mpenzi wa muziki ukiwemo ule wa kizazi kipya au Bongo Fleva.Ni wasanii gani wanaokuvutia zaidi?

SS: Wengi mno maana wamebadilika kweli sisi tuliiona Bongo Flava tangu ilipoanza na kina sugu a.k.a Mr II, Diplomatz na kina Sindira, na hivi sasa wasanii wanazidi kuibuka kwa hiyo ninavutiwa na wengi ila baadhi tu ni kama Ali Kiba, Marlow, K-Lynn, Banana Zoro, Mwana FA na Ay.

BC: Ungetoa ushauri gani kwa wasanii wa kitanzania kwa ujumla katika kuboresha kazi zao na kutizama kwa mapana na marefu masoko ya mbali ikiwemo nchi za Ulaya na Marekani kama ambavyo wasanii wengi wa Afrika Magharibi wamekuwa wakifanya?

SS: Wajitahidi kutumia nafasi za kukutana na wasanii wa hapa Marekani hasa wanapozuru Tanzania na kupata kuongea nao na kuwapa mawasiliano yao na kujaribu kuwa na menejimenti inayoeleweka mameneja na mawakili ili wasiibiwe wala kudanganywa kwasababu ili ufanye kazi na watu wa nje ya nchi yako inatakiwa ujue nini unakifanya. Na pia wasanii wa Marekani hawapendi biashara uchwara kama msanii unaonekana huna mipangilio itakuwa ngumu kushirikiana na wewe.

BC: Sunday,kama unavyojua ulimwengu umekuwa ukishuhudia mabadiliko makubwa,kisiasa,kijamii na kiuchumi.Kwa upande wa siasa,mtu mweusi hivi leo ndio yupo katika “jumba jeupe” hapo hapo Washington DC ulipo.Unaongeleaje uongozi wa Barack Obama kwa muda mfupi ambao ameshakuwa madarakani?

SS: Ni mtu anayejituma sana na anajua nini anataka kwa muda mfupi ameshaonyesha uwezo wa kufanya mengi na wakati huo huo ana upinzani mkali kutoka kwa wa-republikan kwenye Uchumi na Afya ndio masuala makuu yanayoangaliwa na wananchi wa Marekani mpaka hivi sasa anapigania ajenda ya kuwapa watu wote uwezo wa matibabu wa gharama nafuu ambapo serikali itashindana na mashirika binafsi ya Bima kuwapa wale wasio na uwezo nafasi ya kupata huduma za afya.

Lakini mpaka hivi sasa kuna kasheshe nzito bungeni kwani wa-Republican wanamshutumu kwamba anataka kuleta Ujamaa au kuingiza mfumo wa Afya wa Canada na yeye anawaambia la hasha ila kwa kiasi kikubwa anakaribia mno kufanya mageuzi ya kweli katika afya huduma za jamii elimu, sera za biashara, kodi kila jambo amesema atalifuatilia kwa makini kiasi kwamba wanamwambia anajaribu kufanya kila kitu kwa wakati mmoja atashindwa lakini la hasha huyu bwana ana nguvu za kufanya kazi kama Simba, anasafiri anakutana na watu wake hasa Gavana na kamati ya fedha kila siku Jumba jeupe kupata ripoti za maendeleo ya uchumi na pia ana wahudumia wananchi kwa mtandao ameitwa ni rais wa Teknolojia haongei tu kwenye Televisheni bali pia kwenye mtandao wa Jumba jeupe na pia kwenye You Tube nk .Itakumbukwa kampeni zake zilishika moto kwenye mtandao na hivyo moto huo hajauzima amewaruhusu watu kutuma maswali kwenye mtandao wakati akizungumzia masuala muhimu ya taifa hili.

Alipokwenda Ghana aliruhusu watu wa Afrika kutuma maswali kwenye mtandao na wakati alipoongelea vichocheo vya uchumi na mfumo wa afya alizunguka karibu nchi nzima na kufanya mikutano midogo midogo (town hall meetings) na huko pia aliruhusu watu kutuma maswali kwenye mtandao kwa hiyo kwa kweli anafanya si kazi nzuri tu bali ni ya ziada. Amewapa wanajeshi nafasi ya kusoma vyuo bure na pia wachumi wanaeleza masoko ya fedha yamepata ahueni kubwa lakini ni mapema mno kusema kama uchumi ndio umeduta ila nafikiri anafanya kazi nzuri kwa muda mfupi aliokuwa madarakani.

BC: Yapi mapya ambayo yanatokea hivi sasa kwenye maisha yako kwa ujumla?

Ni mengi tu namshukuru Mungu baadhi ni mambo ya kublog na ninawaalika wadau wakipata fursa kutembelea na kujiunga nami kwenye blog yangu www.sundayshomari.blogspot.com tuendeleze libeneke.

BC: Katika masuala ya u- MC unaendelea na unalionaje kwa ujumla?

SS: Hilo suala linaendelea kama kawa nafanya hiyo shughuli kwa wakati wangu binafsi na nimeshazunguka karibu majimbo yote ya Marekani kufanya shughuli hiyo hasa kwenye maharusi na kwa kweli napata nafasi ya kukutana na watu mbali mbali na linanipa faraja kubwa kuwatumikia watu.

BC: Nimeona uliwahi kupata tuzo miaka ya nyuma na pia hivi karibuni unaweza kutuelezea zaidi?

SS: Naam hivi karibuni nilipewa tuzo ya Ubalozi Bora na Jumuiya ya Wanawake na kina Dada wa Afrika waishio Columbus, Ohio wakati wa maadhimisho ya sherehe za Uhuru wa Tanzania kwa sababu ya uwakilishi wangu kwa jumuiya ya watanzania wa Ohio.

Kwahiyo nawashukuru kwa hilo.Pia niliwahi kupata tuzo nyingine huko huko Ohio mwaka 2004 ya Mwl.Nyerere kwa ajili ya huduma na kujitolea katika mambo mbali mbali kwenye jumuiya ya Waafrika huko Ohio na tuzo hiyo nilipewa na gazeti liitwalo African Weekender linalotoka kila mwezi huko Ohio.

Sunday akikabidhiwa tuzo ya Ubalozi au uwakilishi Bora aliyopewa na Jumuiya ya wanawake na kina dada wa huko Columbus,Ohio hivi karibuni.

BC: Asante kwa muda wako Sunday.Tunakutakia kila la kheri katika kazi zako.

SS: Shukran.

Be Sociable, Share!

• 

MTABIRI maarufu wa Afrika Mashariki, Shehe Yahya Hussein ametabiri kuwa Rais Jakaya Kikwete atashinda kwa kishindo katika uchaguzi mkuu ujao na atakayempinga ndani ya chama chake atakufa ghafla.

Sambamba na hilo, atakayeonekana kumshinda nje ya chama chake pia atapoteza maisha vivyo hivyo.

Akitoa utabiri wake jana Dar es Salaam, juu ya uchaguzi mkuu mwakani, Shehe Yahya alisema ushindi wa Rais Kikwete unatokana kurithishwa na Baba wa Taifa, Mwalimu Julius Nyerere mwaka 1995 ilipodaiwa kuwa Rais Kikwete alishinda kwenye kura za maoni lakini akamsihi amwachie Benjamin Mkapa.Kwa undani wa habari hii bonyeza hapa.

Je huu unaweza kuuita “utabiri” au ni…Unakubaliana naye ?Kwanini ?

Pichani juu ni Sheikh Yahya akiwa nyumbani kwake mapema mwaka huu.Ubavuni mwake ni mkewe Bi.Fetty

Be Sociable, Share!

• 

Tatizo hilo linaelekea kupata ufumbuzi. Pengine inatokana na mabadiliko ya kidunia ya sayansi,tekinolojia  na mawasiliano au ni wakati tu umefika wa Tanzania nayo kuzinduka na kuamua kuingia kwenye ramani ya watunzi na wasomaji wa vitabu.

Hivi karibuni,aliyewahi kuwa Gavana wa kwanza wa  Benki Kuu nchini Tanzania,Edwin Mtei, ameandika kitabu. Kitabu kinaitwa From Goatherd to Governor ambacho kwa tafsiri ya moja kwa moja ya Kiswahili ni Kutoka Mchunga Mbuzi mpaka kuwa Gavana. Ni kitabu kuhusu maisha yake kikiwa na mengi kuhusu uhusiano wake na Hayati Mwalimu Julius Kambarage Nyerere ambaye kama wengi tunavyojua,hawakuelewana katika mambo mbalimbali ya sera za kiuchumi.Ukitaka kukinunua kitabu cha Edwin Mtei bonyeza hapa.

Mbali ya Edwin Mtei, aliyewahi kuwa Miss Tanzania 1999,Hoyce Temu naye ametoa kitabu chake.Kinaitwa Nayakumbuka Yote.Mbali ya kuongelea kuhusu maisha yake,kitabu cha Hoyce ni muongozo mzuri kwa wasichana ambao wanataka kuingia au tayari wamo katika sanaa ya mitindo na urembo.Kinacho kipengele cha “Maswali na Majibu” kuhusu sanaa ya urembo.Kukipata kitabu hiki bonyeza hapa.

Hoyce Temu wakati wa uzinduzi wa “Nayakumbuka Yote”

Huu ni mfano na muelekeo mzuri kwa nchi yetu na kwa wapenzi wa kujisomea. Bila shaka hatutaishia kwa Mtei na Temu bali katika siku za karibuni tutaona  wengine wakijitokeza na kuandika. Utamaduni huu ni miongoni mwa tamaduni ambazo mimi binafsi naona zinafaa kuiga.Wenzetu ni mabingwa wa kuandika na kujisomea.Hongera Mtei.Hongera Hoyce.

Vitabu vyote vimetolewa chini ya usimamizi wa kampuni ya Mkuki na Nyota.

Be Sociable, Share!

• 

Kwa mtu yeyote ambaye anapenda fani ya utangazaji au mtu yeyote ambaye ni msikilizaji wa radio,hakuna shaka kabisa kwamba jina la Master T sio geni. Lakini Master T sio jina lake halisi. Jina alilopewa na wazazi wake ni Taji Liundi.

Yeye ni miongoni mwa watangazaji na waongoza shughuli(MCs) ambao wamejijengea jina ,kujikusanyia idadi kubwa ya mashabiki na kujijengea heshima ya aina yake katika fani hiyo maarufu. Wiki chache zijazo ndiye atakayekuwa jukwaani kusimamia shughuli nzito ya kumtafuta mrembo mpya wa Tanzania(Miss Tanzania 2009).Atashirikiana na Nancy Sumari(Miss World Africa,2005) katika zoezi hilo.

Ukimsikiliza iwe ni redioni au akiwa msimamizi wa shughuli fulani utafurahi,utajifunza,utaburudika na kisha bila shaka utakubali kwamba jamaa ana kipaji,anaipenda kazi yake,anakuthamini wewe kama binadamu na anakupenda kama msikilizaji wake. Umakini anaouweka katika kazi yake yaweza kuwa ndio siri ya mafanikio yake.

Yeye ni miongoni mwa wale watangazaji ambao licha ya kujaaliwa kuwa na sauti inayofaa kabisa kwa masuala ya utangazaji,pia ni wenye kipaji kikubwa katika masuala ya lugha.Master T anaimudu vyema lugha ya Kiswahili na pia anakipambanua vyema Kiingereza na pia huwezi kumuweka mbali na Kifaransa.Hii inamfanya akamilishe ile preamble inayosema;ukitaka kuwa mtangazaji mzuri,sharti ujitahidi sana katika masuala ya lugha.

Hivi karibuni nilipata nafasi ya kufanya naye mahojiano ambayo utayasoma hivi punde.Katika ufupi na ufasaha wa aina yake,Master T anaweka wazi masuala mbalimbali muhimu kuhusu historia ya maisha yake,heka heka za utotoni,kazi yake kama mtangazaji,harakati zake katika mwanaharakati dhidi ya ugonjwa hatari wa ukimwi,maoni yake kwa vijana na mengineyo mengi.

Je, unajua ni mkasa gani mkubwa wa kimaisha uliowahi kumkumba Master T? Unajua wazazi wake walitaka awe nani,afanye kazi gani badala ya utangazaji?Nini mtazamo wake kuhusiana na mapambano dhidi ya gonjwa la ukimwi?Fuatana nami katika mahojiano yafuatayo na Master T;

BC: Taji,kwanza kabisa asante kwa kukubali ombi langu la kufanya nawe mahojiano haya.Pole na majukumu.Mambo yanakwendaje?

MASTER T: Vyema Kaka, nami nashukuru kwa fursa hii.

BC: Natambua kwamba wengi wana ufahamu mkubwa kuhusu historia binafsi ya maisha yako.Lakini kwa faida ya wale ambao hawana habari,unaweza kuniambia kwa kifupi tu kuhusu maisha yako ya awali;ulizaliwa wapi,ukakulia wapi,ukasoma wapi na mambo kama hayo?

MASTER T: Nimezaliwa Dar, nilisoma shule ya Msingi Kisarawe pale Kariakoo kwa muda mfupi. Nikaelekea Uswiss (Switzerland) mwisho wa miaka ya 70′ ambapo niliendelea na shule ya msingi nikijifunza Kiingereza na Kifaransa. Tukahamia Zambia na dingi, nikamalizia darasa la saba.

Ikafuata Zimbabwe niliposoma form 1-2, nikaomba kurudi Bongo, nikapangiwa Ilboru Arusha, nikapiga mpaka form 3-6, nikafurahia mafunzo ya Oljoro JKT halafu Chuo cha Diplomasia mapema miaka ya 90′.

Mr.and Mrs.Taji Liundi with their daughter Upile.

BC: Kila binaadamu huwa na hadithi au mikasa ya utotoni ambayo huwa haisahauliki.Kwa upande wako,ukikumbuka maisha ya utotoni,kabla ya kufikisha miaka kumi hivi,nini huwa kinakujia kichwani kwako mara moja?Unakumbuka mkasa gani?

MASTER T: Sina kumbukumbu nzuri, tena ni ugonjwa wangu. Lakini katika udogo wangu, nakumbuka kidogo na nimehadithiwa jinsi nilivyonusurika baada ya kunywa sumu. Wadogo zangu wakafariki. Ni zamani, maisha yanaendelea.Mungu mkubwa katika mipango yake.

BC: Hivi sasa unafanya kazi wapi, kama nani?

MASTER T: Mkuu wa TBC International Radio, 90.fm Dar es salaam. Naipenda sana kazi yangu. Nafurahi pia kuwepo TBC ama Radio Tanzania ambapo mzee wangu aliwahi naye kutangaza kipindi cha Tuambie mwaka 64′.

BC: Nikikaa mahali nikaanza kukuongelea ni lazima kwanza nianze kukuongelea kama mtangazaji kabla sijarukia kwenye mambo mengine. Je nini kilikushawishi ukaamua kwamba utangazaji ndio kazi unayotaka kuifanya maishani mwako? Nani alikuvutia kuingia katika fani hii? Nini chanzo cha jina “Master T”?

MASTER T: Nilitakiwa kuwa mwanadiplomasia. Mama mzazi ndiye aliyeandika barua ya maombi ya kazi IPP. Nilienda kwenye usaili nikiwa sina wazo lolote, usingizi tu. Nikapita mara moja. Sikujua nina sauti nzuri wala nini! Nilikuwa napenda muziki balaa lakini! Nikiwa Zimbabwe, nilikuwa msikilizaji sana wa Radio 3 na msumbufu kwa madjs nikitaka wanipigie nyimbo. Nadhani dingi ndiye aliyeotesha mizizi ya mimi kuwa mtangazaji kwani aliniruhusu kuwa na radio tu! Katika ujana, nilikosa Tv, baiskeli, gari nk! Unoko wake umesaidia.

Charles Hillary aliona ni vema kunita Master na sio Mister kwani nilikuwa mdogo. Hivyo akaanza kunita Master T. Kilichofuata ni kupotea kabisa kwa jina la Taji Liundi hadi siku hizi…

BC: Tangu uanze kazi yako ya utangazaji ni wazi kwamba umeshawahoji watu wengi. Katika watu wote uliowahi kufanya naye mahojiano yupi hutomsahau kamwe? Kwanini? Na labda ni tukio gani la utangazaji ambalo unalikumbuka zaidi?

MASTER T: Dah, labda niseme Kanda Bongoman, kwani ndiye maarufu wa kwanza kumhoji alipokuja kwa mara ya kwanza Tz! Nakumbuka baada ya kipindi, Charles akaniita na kunipa Tax Invoice. Akaniambia nilipie gharama za matangazo ya kupromote tamasha la Kanda nililokuwa nalizungumzia hewani…eh! Monica Mfumia kuniita mwizi…Rankim kufukuzwa, sikufurahi. Mengi kunirudisha Radio One na kuniambia niache kuendesha vicessna wakati ROne ni Boeing, kumkacha Diallo, kusikitika kuondoka Clouds na kuacha vipindi vyangu kama Apex. Kifo cha Kiiza Kahama mtangazaji mwenzangu, kuendesha kituo cha Times hadi kilipofika, na kuangalia nyuma na kumshukuru Mungu kwa watangazaji kibao niliowapa fursa…na watu niliowagusa na wanaonipenda na wengine kutonielewa lakini kuniongelea kama wananijua fika!!

BC: Ulimwengu wa utangazaji na habari hivi sasa unakabiliwa na changamoto mbalimbali zikiwemo kuingia kwa tekinolojia mpya na mbinu mbalimbali za kupashana habari kama vile blogs,facebook,twitter,myspace nk. Kwa mtizamo wako,unadhani ulimwengu wa habari na mawasiliano tuliouzoea unafaidika au unaangamia kutokana na hizi zana mpya? Unatabiri nini kitatokea katika miaka kama kumi hivi ijayo katika habari na mawasiliano?

MASTER T: Knowledge is Power, power is corrupting. Ni jinsi mtu unavyoelewa ama kutafsiri habari. Teknolojia inasogeza uwezo wa mtu kuwa na habari azitakazo kiganjani! Pia inawezesha watu kutengeneza habari na maelezo watakavyo. Inawezekana hata leo Serikali kuiangusha kutokana na maendeleo haya. Matabaka ya wenye uwezo wa kufahamu na wajinga litapanuka, siri zitanyanyasa watu na uongo utawagawanya watu. Habari ndio mfumo ujao wa maisha yetu, jiandae kuwa muelewa vinginevyo….

BC: Hivi karibuni wewe mwenyewe uliamua kuingia kwenye ulimwengu wa “blogs”.Ukaanzisha blog ambayo imelenga zaidi kwenye masuala ya urembo.Ni kwanini umeanza kublog na kwanini labda umeamua kuwa na “niche” ya masuala ya urembo?

MASTER T: Inaitwa UMODO kwenye modotz.blogspot.com. Napenda sana urembo. Sio fashion haswa. Mimi nilikuwa mchoraji, nilikuwa napenda sana kuchora maumbile. Naona uzuri katika kucha, nyusi, vidole, tumbo, makalio, goti nk. Lakini pia, naamini kwamba nchi yetu ipo katika wakati muafaka wa kibiashara kuruhusu umodo kuwa sehemu ya ajira kwa vijana wengi Tanzania. Nashauri tu kwamba tujenge upeo mkubwa zaidi wa maana ya umodo, isije ikiwa ya maumbile vimbaumbau kama wanavyopenda magharibi. Tutafsiri kivyetu, kimitindo na “malighafi zetu”. Hivi karibuni nitatafsiri maana yangu kwa onyesho/shindano langu la kwanza litakaloitwa UNIQ MODO. Tega macho na masikio…

BC: Suala la uhuru wa vyombo vya habari,uhuru binafsi wa mtu kujielezea ni miongoni mwa mambo ambayo bila shaka yatazidi kuwa gumzo kutokana na maendeleo haya ya tekinolojia na upashanaji wa habari. Unapoangalia kuhusu masuala hayo hapa nchini Tanzania; unadhani tunao uhuru wa kutosha katika vyombo vya habari?

MASTER T: Jeff, mimi sio mwandishi wa habari.I am not a journalist. Nasema ukweli na huwa natamka hivyo, nimeweza kufanya kazi katika vyombo vya habari lakini sijasomea hata chembe. Ni mbunifu tu na kwa kweli ni rahisi mno. Kwahiyo najibu kwa mtazamo wangu.

Uhuru wa habari? Uhuru wa aina gani haswa? Wa kumfichua kwa uhakika na taarifa sahihi Fisadi? Kukosoa Chama tawala kwa kukiuka itikadi? Kuainisha kiueledi matatizo ya kimkakati yanayokabili maendeleo ya jamii? Je, tunahitaji uhuru wa namna hiyo? Nani anataka kutunyima uhuru huo? Sio yule yule anayewajibika na ukweli na uwazi unaoendana na demokrasia ya kweli na utawala bora? Uhuru wa habari unaendana na ueledi wa uandishi na wajibu wa dhamana ya uongozi wa wananchi waliyoitoa kwa mtawala. Uwiano ukiwepo. Uhuru upo. Tafakari.

BC: Pamoja na utangazaji, Master T ni msimamizi mzuri wa shughuli . Je ni jambo gani ambalo unaweza kusema huwa unalihofia zaidi unapokuwa unasimamia shughuli au kwa maneno ya kigeni unapokuwa Master of Ceremony?

MASTER T: Sihofii kitu, nakuwa nimesoma na kujianda kwa shughuli kama vile muhusika mkuu! Huwezi kuendesha shughuli ya Rais Kikwete kiblah blah tu, atakuumbua! Unaweza kujenga ama kuporomosha muonekano wa mteja kwa kuboronga. Hivyo ni heshima kubwa na fahari pia kuwakilisha wateja wengi wakubwa wanaonipa fursa ya kuendesha shughuli zao.

Master T akiwa kazini.MC

BC: Kwa muda mrefu sana, wewe umekuwa miongoni mwa watu muhimu waliosimama kidete kuhakikisha kwamba muziki wa bongo fleva unakua,kuheshimika na kuchangia kwa dhati katika maendeleo ya kijamii nk. Nini hasa kilikufanya ukaingia katika harakati za kusaidia maendeleo ya Bongo Fleva?

MASTER T: Mmmh, nilijiengua kwenye muziki huo miaka kama 5 iliyopita baada ya kuona vijana hawasikilizi wala hawaambiwi, soko linapenda rushwa na dhuluma. Nafahamu kwamba nina uwezo mkubwa sana wa kuwasaidia vijana kwani nimeona mengi na nimeishi na kutembela sehemu nyingi duniani. Hivyo nilipogombana na wakuu wangu wa kazi Radio One ili wakina Jaydee waimbe hewani, nilikuwa najitoa wao wapate fursa. Nikawa nafukuzwa kazi na kuhamahama najaribu kueneza injili ya flava zao. Leo mimi naishi kama shujaa masikini wao wanatoa rushwa na kukumbatia soko hewa! Nimechoka.

BC: Hivi karibuni nilifanya mahojiano na Mr.II ambaye kama tunavyojua ni miongoni mwa wasanii wa mwanzo mwanzo kuifanya Bongo Fleva ikubalike katika jamii. Katika mahojiano hayo,Mr.II alisema kwamba muziki wa B-Fleva unahitaji “total overhaul” akimaanisha kwamba hivi sasa muziki umepoteza muelekeo. Je unakubaliana na hoja hiyo? Kama ndio,unadhani nini kinaweza kufanyika ili kurekebisha mambo?

MASTER T: Duh, baada ya maelezo yangu hapo juu, sasa nitapimwa uzalendo! Muziki sio mbaya jamani! Wabane pua au makoo, mbona Marekani wanabana na auto-tune! Ha ha ha ha! Tatizo ni SOKO. Mr 2 alinialika kuzungumza kwenye Hip Hop Summit yake, wasanii sijui walinisikia nikielezea kuhusu SOKO? Nakumbuka siku moja katika uzinduzi wa filamu fulani, nilipata fursa ya kuzungumza mbele ya Waziri wa Utamaduni, nikamwambia, afungue milango yake tuende tukashauriane kuhusu nini kifanywe juu ya SOKO. Hakujibu. Kimya hicho ndicho kitanzi cha muziki huu wa vijana wetu hadi leo. Ukijumuisha na teknolojia ya kushusha muziki kwenye mtandao, nashindwa hata jinsi ya kushauri tufanyeje!

BC: Kwa mapana na marefu umejihusisha na mapambano dhidi ya ugonjwa wa Ukimwi.Umewahi kuwa Kamishna wa Tume,Mwanaharakati asiyechoka katika mapambano. Ukiangalia tangu ulipojitosa katika mapambano haya,kumekuwepo na maendeleo gani? Tunaelekea kuishinda vita hii au safari bado ni ngumu?

MASTER T: Jitihada na fedha tele. Nahisi hatushindi lakini pia najua wapo wanaookoka kwa kuwa wasikilizaji na watekelezaji wa ujumbe sahihi zinazotolewa. Mabadiliko ya tabia ni muhimu sana! Sio rahisi lakini nilazima tuwe wajasiri wa kupinga hisia zetu na kutumia njia bora za kujikinga dhidi ya maambukizi ya VVU. Kupima ni njia moja madhubuti. Mh. Rais anatakiwa kuendelea na kampeni yake kwa KASI na ARI. Hakurudi kupima baada ya miezi mitatu! Kwa kweli, na humu ningeweza kuendelea kufanya kazi ya kuelimisha kitaifa. Lipo jeshi la vijana wengi mahiri waelimishaji rika nchi nzima, wawezeshwe.

Naamini utegemezi wa wahisani ni muhimu katika maeneo nyeti lakini kama ni kufikia wananchi, ni jukumu letu wenyewe. Vyama vya siasa, mashirika, makampuni na asasi ziongeze bidii. Tuwe na mpango kabambe wa kupambana vijijini. Mkakati wa kupunguza maambukizi mijini. Kuna vijana wengi ambao hawakunisikia nikielimisha Ukimwi redioni miaka 7 iliyopita, leo wanahitaji kuelimishwa, vipindi vya nguvu havipo hewani. Siri ni elimu. Wala sio magunia ya pesa! Ugumu wa mapambano ni mafisadi wa raslimali za mapambano dhidi ya UKIMWI!

BC: Maendeleo ya tekinolojia yanamaanisha kupatikana kwa urahisi habari ambazo hapo awali ilikuwa ngumu kuzipata.Hivi leo,kwa mfano,kupitia mitandao, vijana wengi wanaweza kuona vitu kama pornography nk.Unadhani nini kifanyike ili kukabiliana vyema na maendeleo haya ya kitekinolojia hususani katika uhusiano wake na mapambano dhidi ya ukimwi?

MASTER T: Hakuna sehemu duniani ambapo wanashinda vita dhidi ya pornography. Kupigana na moto kwa moto ni kuukuza moto. Kwanini tusiwaelimishe vijana madhara ya kisaikolojia yanayoweza kutokea kwa kujikita kwenye mitandao ya ngono? Tusiwatishe. Kila kijana anataka kuona au kuchungulia utupu akifikia umri fulani, ni natural. Mimi niliangalia na naangalia, lakini hainiathiri kwa vile nimeiweka kwenye kabati maalumu kwenye ubongo wangu la kujiliwaza kingono. Tena sipendi ngono ya moja kwa moja, bora ile inayonifundisha jinsi ya kufurahia tendo zuri la ngono na mke wangu! Sawa?!! Dingi alikomea sehemu tu katika maelezo yake…nani angenifunda zaidi?

To be able to love people,you have to love nature first.People are products of nature.

BC: Mara nyingine katika mapambano makali kama haya dhidi ya Ukimwi,huwa inaweza kutokea kukawa kuna jambo ambalo umelifanyia utafiti binafsi na kuamini kwamba linaweza kuwa suluhisho lakini kila unapojaribu kulisema hakuna anayeelekea kusikia. Je kwako wewe hiyo imeshawahi kutokea? Ni jambo gani?

MASTER T: Nchi yetu iwekeze kwa vijana. Elimu ni swala nyeti. Elimu rasmi, elimu ya vitendo na maarifa ili vijana waweze kujishughulisha na kazi mbalimbali. Fursa za maendeleo katika michezo na kazi za sanaa zizingatiwe. Vijana wengi wanaweza kuvumbua vipawa na vipaji vyao. Tukuze utamaduni wetu ili vijana waitangaze nchi, kwa sanaa za maonyesho, sinema, uchoraji, uchongaji na uundaji samani. Naamini pia kwamba sekta ya hudumua ni muhimu sana na vijana wengi wanaweza kuajiriwa, vijana wa Kenya na Uganda(hata Malawi) wanatupiku mf. mahotelini.

Kaka, hapa naweza gombania urais kwa hoja mbalimbali…nadhani naeleweka kiasi.

BC: Taji anapokuwa hayupo hewani,anapokuwa hayupo katika shughuli yeyote ya ki-uanaharakati ni mtu wa aina gani? Au nikiwauliza rafiki zako wa karibu kuhusu wewe unadhani watasema nini?

MASTER T: Naishi a very private life, inatisha na pia ni faraja kujulikana kwa kiwango changu, huwa najishtukia nikiwa katikati ya watu wengi, nakuwa huru ninapokuwa jukwaani! Napenda sana kucheza soka hivyo nipo uwanjani ofisini ama Kiwanja cha Garden Kino, au Leaders weekend na timu ya Mango. Jumapili naenda Ocean Road kucheza kikapu. Ama nipo sehemu na mamodo tunapiga picha kwa ajili ya blog. Sometimes nazuka kiwanja chochote kile uzunguni ama uswahilini!

Napenda pia kutumia muda na familia ikiwa Mamsup hayuko busy na mwana naye hana mitikasi yake. Vinginevyo, naangalia filamu kwa sana, soka la Arsenal na video za muziki ama nawasha laptop na kurambaza mtandao! Niko simple sana.

BC: Watu wengi wanaweza kusema wewe umeshatimiza ndoto zako kwa kiasi kikubwa. Lakini bila shaka wewe mwenyewe unaweza kuwa na ndoto ambayo bado haijatimia na ungependa itimie siku moja. Ipo?Unaweza kuniambia ni ndoto gani hiyo?

MASTER T: Yes, now I wanna make money!

BC: Kwa ujumla una ushauri gani kwa vijana kuhusiana na suala zima la maisha na mafanikio?

MASTER T: “Acha kufanya yale ambayo yanakuvutia sana sasa, ili utekeleze yale ambayo yataongeza tija na faraja katika maisha yako!”

BC: Ni watangazaji gani ambao unapenda kazi zao hapa duniani? Kwanini?

MASTER T: Duh, Kaka, huwa sina hizo sana. Larry King ni yeye, Oprah ni pekee, Mike Embley, Muhagama, Seba, Nyaisanga, GG, PJ, Joan, Fredwaa, Kipozi, Tido, Sanga, Amanpour, Ducet, Degeneres, Zee A, Gardner, Salama nk,mimi, wote tunatakiwa kumshukuru Mwenyezi Mungu kwa kutupa vipaji vinavyogusa mamilioni ya watu. Ni nadra na baraka tele!!

Sifa kuu ni muono wa mbali, ubunifu, umahiri na ustadi mkubwa kila siku!

BC:  Asante sana kwa muda wako Taji.Nakutakia kila la kheri katika shughuli zako.

MASTER T: Amen! Ahsante tena kwa fursa hii na natumaini majibu yangu ni stahili.

Be Sociable, Share!

• 

Kila siku ya Jumanne(kama leo hivi) watanzania siku hizi hupata nafasi ya kujiongezea maarifa mbalimbali,kuburudika,kujielimisha na kujifahamisha kupitia gazeti la Kwanza Jamii kama linavyoonekana katika picha ya hapo juu.Hiyo ni taswira halisi ya gazeti la wiki hii ambalo limeshatinga mitaani.

Humo ndani utakuta makala mbalimbali kutoka kwa waandishi mbalimbali nikiwemo mimi,Jeff Msangi. Wengine ni  kama vile Maggid Mjengwa, Freddy Macha, BAP (Born Again Pagan), Subi Sabato,Prof.Joseph Mbele, Dr.Bukaza Chachage, Joseph Mihangwa, Padri Privatus Karugendo, Eliamani Laltaika bila kusahau kona ya Aunt Subira na wengine wengi.

Lakini kama uko mbali na Tanzania au kwa sababu moja au nyingine huwezi kupata kopi halisi ya Kwanza Jamii, habari nzuri ni kwamba unaweza kuperuzi habari mbalimbali kupitia mtandaoni. Bonyeza hapa.

Be Sociable, Share!

•