Kifo cha Nasma ni pigo kubwa kwa ulimwengu wa taarab.Ilikuwa ni Bi.Nasma na shoga yake Khadija Omar Kopa ambao waliifanya taarab kupendwa zaidi hususani walipoanzisha style iliyokuja kujulikana kote Afrika Mashariki kama “mipasho”. Hapo ndipo nyimbo zake kama Taarab Iko Huku na Salamu la Michelini zilipokuwa gumzo na kivutio cha kila sikio.

Mojawapo ya nyimbo zake ambazo pia zilipendwa ni ule ulioitwa Mwanamke Mazingira. Usikilize hapo chini..Pole kwa ndugu,jamaa,marafiki na wapenzi wote wa sanaa na muziki popote pale ulimwenguni.Pumzika Kwa Amani Bi.Nasma Khamis Kidogo!

Be Sociable, Share!

• 

Mwanahawa Ally(pichani) ni miongoni mwa waimbaji Taarabu maarufu nchini Tanzania. Mojawapo ya nyimbo zake ambazo zinajulikana sana ni kama ule wa Viumbe Wazito Part 1 na Part 2. Unaweza kutizama video za nyimbo hizo kwa kubonyeza hapa na hapa. Je Mwanahawa anapoimba kuhusu Viumbe Wazito anamaanisha nini haswa?

Be Sociable, Share!

• 

WASANII maarufu wa muziki wa taarab nchini, Bi Kidude(pichani) na Shakila Said ni miongoni mwa wasanii watakaotumbuiza katika tamasha la mwaka mmoja la kundi la muziki huo la Jahazi Modern Taarab litakalofanyika Ijumaa jijini Dar es Salaam.Kwa undani zaidi wa habari hii bonyeza hapa. Hii ni fursa nzuri kwa wapenzi wa muziki wa taarab na pia Bi.Kidude na Shakila Said kwenda kuwaona.

Be Sociable, Share!

• 

Wakati mipango hiyo ikiendelea,baadhi yenu mmekuwa mkiuliza mbona muziki wa mwambao haupewi nafasi ndani ya BC?Msitie shaka kwani BC haina sera za upendeleo na kwa maana hiyi leo hatuna budi kutimiza haja hiyo ya wapenzi wa muziki wa mwambao.Huu ni muziki ambao huuwezi kuutenganisha na Tanzania hata kidogo.Anayetuburudisha hivi leo ni Patricia Hillary na kibao chake maarufu cha Njiwa.Kama uko mbali na wale uwapendao,wale wakufaao maishani,mtume japo njiwa akupelekee zako salamu.Ijumaa Njema!

Be Sociable, Share!

• 

Muziki wa mwambao una aina kadha wa kadha.Wataalamu wa muziki wa aina hiyo wanaweza kukuambia mengi kuhusu aina hizo na pia jinsi gani unaweza kuitofautisha kutokana na midundo,mashairi, muonekano wa waimbaji wake nk.

Aina mojawapo iliyojipatia umaarufu sana kipindi cha nyuma kidogo ilikuwa inajulikana kama mipasho”. Neno hili mpaka hivi leo bado tafsiri yake haiko wazi.Jambo moja ambalo lipo wazi ni kwamba kwenye muziki wa mwambao ambao wengi wetu tunaufahamu kwa kifupi tu kama Taarab, majina ya Nasma Khamisi Kidogo (pichani kushoto) na Bi.Khadija Omar Kopa (pichani kulia) ni majina ambayo wapenzi wa muziki huo na watanzania kwa ujumla wanayatambua fika. Kuna wakati “upinzani” baina yao ulikuwa ni kama ule wa Yanga na Simba. Jambo moja ambalo wengi tulikuwa hatujui ni kwamba magwiji hawa wa muziki wa taarabu ni marafiki na kilichokuwa kinatendeka kwenye majukwaa na katika mashairi ilikuwa ni hali halisi ya usanii uliokomaa. Hivi neno “mipasho” lina maana gani?

Be Sociable, Share!

• 

Miongoni mwa nyimbo zenye mahadhi ya mwambao zilizotokea kupendwa sana ni ule uliojulikana kama “Njiwa” uliokuwa na mashairi yenye maneno kama “ewe njiwa,ewe njiwa,peleka salamu”. Mwimbaji wa wimbo huo alikuwa ni Patricia Hillary, malikia wa taarabu enzi hizo. Pichani ni Patricia Hillary akifanya vitu vyake. Patricia bado anajishughulisha na muziki na kuna habari kwamba amevirudia upya vibao vyake vilivyotamba enzi hizi ambavyo bado vinapendwa na wengi.

Be Sociable, Share!

• 

Picha hii ni kwa hisani ya Marcel Mutsaers aliyompiga Bi.Kidude wakati wa Tamasha lijulikanalo kama Festival Mundial kule Tilburg-Uholanzi mwezi June mwaka 2006.

Umri wake halisi haujulikani. Kinachojulikana ni kwamba ana umri zaidi ya miaka 90 na hivi sasa sio ajabu akawa ameshafikisha umri wa miaka 100! Amekuwa muimbaji tangu miaka ya 1920 akiwa ni mfuasi wa Sitti Bin Saad mmojawapo wa waimbaji wa mwanzo kabisa wa taarabu visiwani Zanzibar.

Hivi leo anatambulika na kuheshimika kama malikia wa taarabu na mambo ya unyago asiye na mpinzani. Alizaliwa katika kijiji cha Mfagimaringo katika familia ya watoto saba. Jina alilopewa na wazazi wake alipozaliwa ni Fatuma Binti Baraka kabla jina maarufu la Bi.Kidude halijashika baadaye alipoanza kuwa maarufu katika uimbaji.Wazazi wake walikuwa ni wafanyabiashara ya kuuza nazi enzi hizo za Zanzibar iliyokuwa chini ya utawala wa wakoloni.

Katika mahojiano mbalimbali aliyofanya na vyombo tofauti tofauti vya habari ulimwenguni Bi.Kidude anasema alianza kuimba akiwa na umri mdogo wa miaka 10. Anasema uimbaji alijifunza kutoka kwa Sitti binti Saad tena kwa kujificha nje ya nyumba na kumsikiliza Sitti binti Saad akiwaimbia wageni ambao mara nyingi walikuwa wakipelekwa pale na yeye Bi.Kidude.

Akiwa na umri wa miaka 13 tu hakuwa na jinsi bali kukimbilia Tanzania bara(Tanganyika enzi hizo) ili kuepuka kuozeshwa kwa nguvu. Akiwa Tanzania bara alizunguka kila kona ya nchi akiwa muimbaji katika makundi mbalimbali ya muziki wa taarabu likiwemo lile maarufu la Egyptian Musical Taarab. Baadaye alihamia nchini Misri kwa kifupi kabla hajarejea kisiwani Zanzibar mahali ambapo anaishi mpaka hivi leo.

Mbali na uimbaji Bi.Kidude pia ni mfanyabiashara.Anauza “wanja” na “hina” ambazo anazitengeneza mwenyewe. Pia ni mtaalamu wa dawa za mitishamba lakini zaidi ya yote yeye ni Mwalimu wa “unyago” ambapo anacho chuo chake mwenyewe huku akijivunia rekodi kwamba katika wanafunzi wake wote hakuna ambaye ameshawahi kupewa talaka na mumewe. Pengine hii ndio sababu mwaka 2004 ulipozuka umbea kwamba Bi.Kidude amefariki dunia wakati alipokuwa katika ziara ndefu ya kimuziki Ulaya na Mashariki ya mbali, kila mtu kisiwani Zanzibar alishikwa na butwaa na majonzi! Kwa bahati nzuri habari za “kifo” chake zilikuwa ni uzushi tu.

Picha kwa niaba ya Issa Michuzi.

Mwaka 2005 huko Gateshead, Newcastle nchini Uingereza,Bi.Kidude alipokea tuzo yenye heshima kutoka World Music Expo (WOMEX) kwa mchango wake katika muziki na utamaduni wa Zanzibar. Katika kinyang’anyiro hicho aliwashinda wanamuziki mahiri kama Peter Gabriel, Miriam Makeba na wengineo. Bi.Kidude anasema hawezi kuacha kuimba mpaka siku atakapoiaga dunia kwani akiimba anajihisi kuwa binti wa miaka 14!

Mwaka jana, kampuni ya nchini Uingereza iitwayo ScreenStation kwa kushirikiana na Busara Promotions walitoa documentary iitwayo “As Old As My Tongue-The Myth and Life of Bi.Kidude” inayoelezea historia nzima ya maisha yake. Unaweza kuona dakika kama saba hivi za documentary hiyo hapa chini.Anasema yeye anakunywa na pia anavuta,lakini zaidi ya yote anaweza kuimba bila hata kutumia spika ya mdomo yaani microphone.

Be Sociable, Share!

•