Kheri iwe kwako msomaji.Natumaini hujambo na wiki hii haikuwa mbaya kwako.Kama ilikuwa na mikwaruzo,basi ni ile ambayo unaweza kuikabili.Kama ilikuwa ngumu sana,basi mwachie Muumba.Yeye anaweza.

Hii ni weekend ya katikati mwa mwezi. Hapa tunaweza kusema kama hesabu za mwanzo wa mwezi zilikwenda kombo,basi leo tanki la mafuta lipo chini ya mstari wa katikati.Usitie shaka,wenzako wakikupigia simu kwamba muongozane kwenda viwanjani,tia  kisingizio cha “dozi ya malaria”. Si unajua hakuna kitu kibaya kama kwenda mahali na kuanza kutumbua huku hesabu kali zikiendelea kichwani.Unaweza kabwa na mnofu wa nyama.Kile kicheko cha bar ya kona kinaota mbawa. Zile mbwembwe za “tuletee kama tulivyo na kisha mwambie jamaa wa jikoni aje” leo sio mahala pake.

Ushauri wangu;weekend hii tumia muda wako nyumbani.Cheza na wanao.Soma nao,cheka nao. Hilo likikushinda (yawezekana hujazoea au watoto wana ratiba zingine za birthday parties nk, basi jisomee.Kama unacho kitabu cha After  4:30 cha David G.Mailu kikamate uso. Kuwa makini,kilipigwa marufuku. Sishauri kukamata remote na kuanza kubadili channel. Ina raha gani kushinda kutwa  ukitazama wenzako wanafanya wanachokipenda na kulipwa ilhali wewe chali?! Aste aste,msaada kwenye tuta.Vyovyote vile iwavyo, usikate tamaa,ni life.Kuna leo na kuna kesho. Unaweza lala masikini ukaamka tajiri.Cheza karata zako vyema.Jitokeze mahali sahihi katika wakati sahihi au muafaka.

Leo katika Zilipendwa tunaelekea Tabora.Kule tunawakuta Tabora Jazz Band.Miaka mingi imeshapita tangu nitembelee mkoa wa Tabora. Leo hii sina hata kumbukumbu nzuri kwamba mara ya mwisho kufika pale ilikuwa lini.Pamoja na hayo, bado ninakumbuka kwamba niliupenda ule mji.Enzi zile,ulikuwa ni mji simple usio na mengi.Watu walijuana vyema.Nakumbuka Chuo cha Uhazili.Kilisifika kwa kutoa makatibu muhtasi wa “ukweli”.Mama zangu wadogo kadhaa wamesoma pale.Nakumbuka shule ya sekondari Uyui.Nilikwenda pale kumsalimia mjomba wangu alipokuwa anasoma pale. Nakumbuka Tabora Girls na Tabora Boys. Mpaka hivi leo nina ndugu wanaishi maeneo ya kule. Nakumbuka disco la pale.Mwana Isungu.Hospitali ya Kitete.Tabora,Tabora,Tabora…nitarudi.

Tukiachana na kumbukumbu yangu inayofifia kuhusu Tabora,Tabora Jazz Band wanao wimbo unaoitwa Tatu Wajidanganya. Kwamba Tatu anadhani kwa sababu anapendwa,basi anayo nguvu ya kumgombanisha jamaa na ndugu zake.Penzi likashinda undugu.Inawezekana?

Wimbo huu ni miongoni mwa zile nyimbo ambazo kwa namna fulani zilikuwa zinatupa kitambulisho cha muziki wa kitanzania ambao ulikuwa ni mchanganyiko mzuri sana wa Afro-Jazz au Afro-Cuban.Jaribu kusikiliza jinsi ala zilivyopangwa.Piga picha jinsi jamaa walivyokuwa jukwaani na zile bugaloo zao.Burudani ya kutosha.Basi burudika  na Tatu Wajidanganya na uwe na weekend njema.

Be Sociable, Share!

• 

Ni Ijumaa jioni ninapoanza kuandika.Siku ya kazi imemalizika na nipo tayari kuelekea nyumbani.Lakini kutokana na ukweli kwamba jiji la Dar-es-salaam hivi sasa linaanza kufanana na Rio De Janeiro kwa foleni,sina budi kusubiri kidogo foleni ipungue.

Nafanya hivi kwa sababu mbili;kwanza ni kweli kwamba sipendi foleni(sijamuona mtu anayependa labda anayejifunza kuendesha gari maana kwake foleni ni muda wa kupumua).Pili sina haraka.Ni Ijumaa na weekend ndio imeshaingia.Nakimbilia wapi? Isitoshe sina wese la kupoteza kwenye foleni.Hapo sitaki kuongelea uchafuzi wa mazingira…

Taratibu nanyanyua mikoba yangu tayari kutoka.Wiki hii kumekuwa na mvua.Kwa jiji hili,mvua ni kama upanga unaokata kote kote.Ikinyesha mvua,joto linapungua kidogo.Tunapata ahueni,angalau suti zinavalika na kutoonekana kichekesho.Ndio maana sitokaa nitafute kazi katika ofisi ambayo wanasisitiza suti kuwa vazi rasmi.What are they thinking!Na joto lote hili,suti?!

Kwa upande mwingine,mvua ni kero.Miundo mbinu ya Dar inakaribia kufanana na ile ya Kibera kule Nairobi au Makoko kule Lagos.Mvua kidogo tu hapapitiki.Unaweza dhani bahari imehamia Posta Mpya.Ghafla jiji linageuka kuwa mto usio na mwelekeo.Mvua ikinyesha kama huna vile viatu vya plastic,basi jiandae kutembea peku.Kama kutembea peku unaona hatari basi jiandae kupakatwa au kubebwa na vijana wanaopata mlo wao wa siku kwa kuvusha watu katika madimbwi.Pengine ndio maana jiji hili likaitwa Bongo kabla ya nchi nzima kupachikwa jina hilo.

Wakati mwingine najiuliza,hivi sisi ni kipi tunachokiweza?Kipi ambacho tunaweza kusimama na kunyanyua mabega na kichwa kama twiga na kusema “unaona hiki ni chetu,tunakiweza,tumekiunda wenyewe na tunakithamini”.Ningali nikitafuta jibu.

Ninapojiandaa kuianza weekend nakumbuka kwamba leo ni Ijumaa na hivyo ni ile siku ya Zilipendwa.Weekend hii nina mpango wa kwenda “Mji Kasoro Bahari” kumjulia hali Mama.Kila ninapowaza kuhusu Mji Kasoro Bahari, napata picha jinsi weekend za enzi hizo zilivyokuwa.Enzi za kina Mbaraka Mwinshehe na Morogoro Jazz Band.Wakati huo walivaa ‘bugaloo” ambazo siku hizi,pengine kwa kushindwa kuwa wabunifu,tumeamua kuzirejesha katika fasheni. Juu nibanie,chini nimwagie.

Nawaza jinsi safari yangu itakavyokuwa.Nawaza jinsi nitakavyokwaruzana na madereva wenzangu.Njia ya Morogoro nyembamba.Magari makubwa.Nawaza jinsi wengine watakavyonirushia matusi kwa sababu naendesha taratibu huku nikijipa moyo “bora kufika”.

Hapo ndipo ninapoamua kuweka rekodi ya Mbaraka Mwinshehe na Morogoro Jazz wakisema Matusi ya Nini?Burudika ndugu yangu na nakutakia weekend njema.Kunywa kistaarabu na ukiona huwezi kupiga hatua tano zilizonyooka,basi usithubutu kuendesha gari.Ita taxi au nipigie mimi nikufuate ulipo.Namba yangu ni 111.

Be Sociable, Share!

• 

Mwisho wa wiki ndio unaingia.Wiki nyingine imekatika.Siku zinakata mbuga.Malengo,malengo.Matumaini,matumaini.Imani,Imani.Hayo ndio mambo makuu matatu yanayotusukuma.Kwamba kesho itakuwa bora kuliko leo.Kwamba kesho,endapo nitapata “kikombe cha uzima” kutoka kwa Babu Loliondo,basi huenda keshokutwa na siku zitakazofuatia mambo yatajipa.Hope and Faith.

Kwa bahati mbaya wiki hii Tanzania tumekumbwa na msiba mzito.Ni msiba wa kuondokewa na wenzetu 13 katika ajali mbaya iliyowakumba wanamuziki,mafundi mitambo na viongozi wa  Five Stars Modern Taarab.Mungu aziweke mahali pema peponi roho za marehemu na awaponye haraka wote waliojeruhiwa katika ajali hiyo na nyingine nyingi ambazo zinatokea kila kukicha kwa sababu za ubinafsi za watu wachache na pia viongozi na wawajibikaji wasiowajibika katika kuepusha majanga kama haya.

Hapa BC kila mwisho wa wiki huwa tuna jadi ya kuzikumbuka “Zilizopendwa”.Kuna baadhi yenu nisipowawekea zilipendwa hapa mwishoni mwa wiki,mnaninunia kabisa.Naelewa kwanini na nitajitahidi kukidhi matakwa yenu.

Kama ambavyo mmeona,tumeanza kuzikumbuka zilizopendwa kutoka pia katika Bongo Fleva na sio Muziki wa Dansi peke yake.Tulianza na Kighetogheto kutoka kwa Juma Nature. SN aliweka maoni yaliyonivutia sana.Yalinikumbusha maisha ya kawaida.Ya yule mwenzangu na mie anayeisukuma siku kwa mtaji wake mwenyewe(nguvu zake).Yule ambaye tunamjali wakati wa uchaguzi pekee.Yule…

Sasa kutokana na matukio ya wiki hii(misiba) na kuwaenzi wenzetu waliotangulia,kwa kiasi fulani ilikuwa vigumu kuchagua wimbo wa kupiga.Ni jadi na utamaduni wetu kuheshimu mauti.Hapo ndipo nikakumbuka vijana wa Daz Nundaz.Unawakumbuka?

Makazi yao makuu yalikuwa Sinza(zamani palikuwa panaitwa kwa wajanja.Sijui siku hizi). Daz Nundaz walipotoka enzi zile,waliingia kwa kishindo kisichokuwa cha kawaida.Wimbo kama huu ambao nitakuchezea hivi leo,ulikuwa ni street anthem kwa mapana na marefu.Kitu ambacho sina uhakika nacho ni kama watu walisikiliza kwa makini mashairi ya wimbo huu.Ni mambo yaliyotokea,yanayotokea na yataendelea kutokea.Tumeshudia wiki hii.”Makamanda” kadhaa wamerejea kwa Muumba!Niliona wimbo huu utakidhi haja na maudhui yanayoambatana na matukio ya wiki hii.

Wimbo unaitwa Kamanda.Unapousikiliza wimbo wa Kamanda kutoka kwa Daz Nundaz,mkumbuke Muumba na uwaombee kheri wote waliotangulia wakiweko Five Stars Modern Taarab.Listen Up and have a peaceful weekend.

Pichani ni Ferouz(kushoto) na Daz Mwalimu(kulia).Sajo hakuwepo

Be Sociable, Share!

• 

Hivi tunazo nyimbo za Bongo Fleva ambazo tunaweza kuziweka kwenye kundi la “Zilipendwa”? Hilo lilikuwa swali kutoka kwa rafiki yangu mmoja ambaye mimi na yeye huwa tunapenda kukutana mwisho wa wiki kwa kikombe cha kahawa huku tukizungumzia muziki,siasa,jamii,maisha and you name it…

Jibu nililompa ni kwamba Yes kuna nyimbo ambazo bila kusita naweza kuziweka kwenye kundi la “Zilipendwa” kwa maana ya kwamba zilipotoka enzi zile zilitingisha na mpaka hivi leo zikipigwa mahali(kutegemea na umri wa watu waliopo) kuna watu wanaweza pandisha mzuka na kukumbushwa mbali.Lakini ni nyimbo gani?

Hapo ndipo nilipoanza kuangalia wasanii waliotamba zaidi miaka ile.Nikamkuta Juma Nature na album yake ya Nini Chanzo.Pale kuna wimbo Kighetogheto. Enzi hizo Nature alikuwa kwenye style yake ambayo huwa napenda kuiita Raw. Baadae alibadilika kidogo kitu ambacho baadhi ya mashabiki wake hawakukifurahia sana.

Naam hii hapa Zilipendwa yetu ya wikiendi hii.Ni Bongo Fleva…Kighetogheto.Unakubaliana nami kwamba tunaweza sasa kuwa na “zilipendwa” kutoka kwenye Bongo Fleva na sio Muziki wa Dansi pekee?Maoni

Be Sociable, Share!

• 

Ghafla bin vuu,miezi miwili ya mwanzo katika mwaka huu wa 2011 imeshakatika.Siku zinakwenda mbio kama risasi za moto.Kasi hiyo inaweza kuwa nzuri na inaweza kuwa mbaya.Kuna ambao tunatamani siku zisiende haraka na kuna ambao tunatamani siku ziende,mipango mingine itimizwe na ndoto zigeuke kuwa kweli.Ni maisha.Ndio maana kuna kila tafsiri ya maisha na kila mtu anabakia kuwa sahihi.

Leo tunaye Marijani Rajab akiwa na Dar International.Wimbo unaitwa Mwanameka.Ni wimbo wenye maudhui ya mapenzi yenye mafunzo makali sana.Usikilize hapa

Be Sociable, Share!

• 

Mwezi wa kwanza karibuni tunaumaliza.Wafanyabiashara wengi huulalamikia mwezi huu kutokana na mapato yao kupungua sana. Watu wengi huwa wanakuwa katika breki ya “matumizi” baada ya mwezi wa 12 ambao huwa unaaminika kuwa mwezi wa kipato. Matumizi huzidi kipimo. Kuna Xmas,ubarikio,ubatizo nk.Vyote hivyo huhitaji matumizi.

Lakini ukiachana na mwezi huu wa kwanza,wapo wenzetu ambao wao hawajali mwezi wa kwanza wala wa mwisho,wala wa katikati. Kwao kila siku ni muda wa matumizi. Akiingia Bar lazima kila mtu ajue kwamba fulani kaingia.Anapoketi ni pale kaunta. Mezani kuna simu kama tatu hivi.Zote za bei mbaya.Ameunganishwa na mitandao yote mikubwa. Utamuonea huruma zinapoita zote kwa pamoja.Mbaya zaidi ni pale zinapoita kwa pamoja na wote wanaojaribu kumpigia ni vimwana wake tofauti.Aanze na yupi kisha amalizie na yupi?

Huyu bwana hali na kunywa peke yake.Sio mchoyo.Nyote mliopo pale mtafaidi.Maagizo yake huwa ni “mpelekee kila mtu aliyepo hapa kinywaji anachotaka”.Ili mradi tu.Fikra kwamba anatakiwa kuwekeza kwa kesho hazipo.Alirithi utajiri na anachojua yeye ni kuutumia vilivyo.Bomoa leo tutajenga kesho.

Leo tunao Juwata Jazz Band au Msondo.Hii ni miongoni mwa bendi kongwe kabisa nchini.Katika wimbo huu,Tupa Tupa,wanatoa usia au ushauri mzuri sana kuhusu maisha.Kuhusu kujilinda na yale ya kesho au keshokutwa.Wanaasa kuhusu kutopenda anasa. Usikilize kwa makini.Enjoy your weekend.

Be Sociable, Share!

• 

Kwa kawaida mwezi wa kwanza huwa mgumu!Niulize kwanini?Sababu ni nyingi.Lakini zile ambazo tumezizoea ni kwamba “mifuko” huwa inakuwa myeupee.Ita uchakavu ukipenda.Baada ya kunywa,kula na kusaza wakati wa Xmas,mwezi wa kwanza huwa ni muda wa kutafakari.Mwezi wa kukuna kichwa ukijiuliza mwisho wa mwezi unafika lini.Ukienda benki yule “teller” asipokuwa makini anaweza akaambulia za uso au matusi.Iweje akaunti yangu ionyeshe sina kitu? Well…matumizi.Ulipitiliza mtu wangu.Ukajifanya tupatupa pale Magomeni,pale Mwembe Yanga,pale “showroom” au Samaki Samaki,pale Keko Mwanga kwa yule mpika “kiti moto” maarufu,pale…

Kwa bahati mbaya hasira huwa zina tabia ya kupelekwa kusiko.Unwaranted Anger.Anatafutwa “victim”  hapo.Aliyepo mbele yako ndio huyo huyo. Unaambiwa umeingia anga zangu. Yaani ni kama vile kuketi kwenye mataluma ya reli na kujifanya husikii honi.

Mambo huweza kwenda kombo victim akawa mpenzi/mke au mume.Ghafla mashavu yanavimba,amani inatoweka,vijembe kwa kwenda mbele,ugomvi usio na mwenyewe.Kisa?Hawala ya fedha. Ukichunguza sana kisa ni kuchacha.Bwana hataki kuketi karibu na Mamaa kwa kuhofia akifanya hivyo ataulizwa kuhusu ile doti ya kitenge kutoka Kongo aliyoahidi. Dawa,kujidai una mawazo mengi kichwani na bize na kazi. Siku hizi wengine wanakimbilia kwenye Facebook. Busy kutwa ku-connect na marafiki.Hakuna anayeweza kuamua ugomvi wa namna hiyo.Majirani wanabakia kuwa “shingo feni”.Wanasikilizia ukutani.

Hakuna anayeweza kuamua isipokuwa wapenzi wenyewe.Hiyo ndio raha na karaha ya mapenzi.Ndio maana unaambiwa wanapogombana wawili wapendanao,usiingilie.Ukijifanya kuingilia mwisho wa siku wenyewe wanapatana kimbembe kinabaki kwako.Unasutwa.Siku hizi nasikia kuna matarumbeta ya kukodishwa kwa ajili ya “kusuta” mtu!

Nyenzo mojawapo zinazotumika katika kupatana kwa wawili wapendanao ni nyimbo.Tangu enzi na enzi nyimbo za mahaba zimekuwa nyingi zaidi.Zina maana yake.Unaweza kuelezea kilichomo moyoni bila kusema sana.Mpenzi nisamehe,sitorudia tena,rudi nyumbani tujenge familia.Ili mradi tu maneno yanayoweza kupenya kwenye ubongo na fikra.

Mfano ni Zilipendwa ya leo.Wimbo unaitwa Nirudie Mama,ni kutoka kwao Moro Jazz Band kutoka ule mji kasoro bahari,kule kwenye Milima ya Uluguru kama inavyoonyesha picha hapo juu.Kama ulivyo ujumbe uliomo katika nyimbo hii,ukikosea au mkikoseana,basi isiwe ngumu sana kuombana msamaha.Kubali yaishe.Ni uungwana na ushujaa.Life goes on.Weekend njema

Be Sociable, Share!

• 

Mambo vipi? Kama hukupata nafasi ya kusoma salamu zangu za Mwaka Mpya kwako,naomba nichukue nafasi hii tena kukupongeza kwa kumaliza mwaka 2010 salama na kukutakia kila la kheri kwa mwaka huu mpya wa 2011.Happy New Year!!

Mwaka 2011 tayari umeshaanza kukata mbuga.Wikiendi ya kwanza ndio hiyo imeshawadia.Wiki 52 tayari zinapungua na kuwa wiki 51!Kwetu sisi BC,pamoja na kwamba ni mwaka mpya,jadi yetu ya Zilipendwa kila mwisho wa wiki,haijali mwaka mpya wala nini.Mwendo ni ule ule.Burudani.

Leo tunarudi miaka chungu mbovu nyuma.Burudani ya leo ni kutoka kwa NUTA Jazz Band. Bendi hii ambayo mfululizo wake ndio uliokuja kutupa Msondo Ngoma tuliyonayo hivi leo,ilianzishwa mwaka 1964. Wanamuziki maarufu nchini kama vile Abel Balthazar,Hassani Bitchuka,Cosma Tobias,Muhidin Gurumo na wengineo ni matunda ya NUTA Jazz Band kabla hawajichomoa na kuelekea kwingineko.

Wimbo unaitwa Mpenzi Nakukanya. Ni ujumbe maridhawa wa mapenzi,ndoa na maisha.Burudika,wikiendi njema.

Be Sociable, Share!

• 

Keshokutwa,siku ya Alhamisi tarehe 30 December,ndani ya Mzalendo Pub jijini Dar-es-salaam,kutafanyika mpambano wa  kukata na shoka baina ya bendi mbili kongwe nchini Tanzania. Ni mpambano wa Mlimani Park Orchestra dhidi ya mahasimu wao Msondo Ngoma.

Kama wewe ni miongoni mwa wale wapenzi wa daima dumu wa muziki wa dansi au watu ambao wamekuwa wakifuatilia muziki wa dansi nchini,ni wazi kwamba ipo bendi,miongoni mwa hizo mbili,ambayo wewe ni “mnazi” wake zaidi.

Mpambano kama huu bila ubishi ni jambo ambalo achilia mbali kwamba ni nadra kutokea,bali ni tukio ambalo sio la kulikosa.Ni Simba na Yanga kwa upande wa muziki.Kama ni ndani ya La Liga,basi ni El Classico(Real Madrid Vs Barcelona).

Kila bendi imeahidi makubwa.Tambo ni zile zile kama zilivyo kwenye utani mwingine wowote wa jadi.Sikinde wamejitamba zaidi kwa kumrudisha nyumbani,Max Bushoke,maalumu kwa mpambano huu!

Ingawa Msondo mpaka hivi sasa hawajaagiza “kifaa” chochote kutokea nje ya nchi,wao wanasema moto wao ni ule ule uliowafanya wakaitwa Baba ya Muziki.

Je,wewe ni shabiki wa Msondo au Sikinde?Unadhani nani ataibuka mshindi?(sijajua utaratibu utakaotumia kumpata mshindi,kama upo).Kwa vyovyote vile,hakuna ubishi kwamba huu utakuwa mpambano wa aina yake na ambao utatoa burudani ya kweli kwa mashabiki watakaohudhuria.Kila la kheri kwa bendi zote? Au unataka kujua mimi ni shabiki wa bendi gani….?

Be Sociable, Share!

• 

Bado namsaka mtu aliyekuwepo pale uwanjani na baadaye akahudhuria “dansi la Uhuru” ili atupe soga kinabaubaga jinsi mambo yalivyokwenda siku ile,Jumapili iliyofuatia na jinsi watu walivyokwenda makazini Jumatatu yake huku wakiwa vifua mbele na mabega juu wakitambua fika kwamba “bosi” wa kizungu siku zake zilikuwa zimekwisha.

Major Nyirenda,kabla hajaiaga dunia hii, alitupa BC mahojiano ambayo ni lulu.Alieleza kwa ufasaha jinsi ambayo zoezi la kuuwasha mwenge na kuinyanyua bendera katika kilele cha Mlima Kilimanjaro lilivyokwenda.Mwenyezi Mungu ailaze roho yake mahali pema peponi.Amina.

Wakati huo,kwa mujibu wa historia,vuguvugu la nchi za kiafrika kutaka kujitawala zilikuwa kila kona.Mkoloni akawa anaambiwa KwaHeri.Thank you but No Thank you. Kila mtu alitamani Afrika iliyo huru.Viongozi wa wakati ule walikuwa na vision(dira) hiyo.Viongozi wa leo wana dira gani? Wanapigania kitu gani? Wanataka kuziona nchi zao zikipata mafanikio gani? Hayo ni maswali magumu sana.

Kimsingi mkoloni hakupenda kuondoka barani Afrika. Alipapenda.Kwanini asipapende?Ni bara tajiri kupita yote.Maziwa,mito,bahari,hali ya hewa safi…you name it.Bara pekee ambalo,kama kila kitu kingekuwa sawa,ni bara linalojitosheleza. Ni bara ambalo lina kila aina ya neema kutoka kwa Muumba. Mshindi wa Tuzo ya Nobel,Wole Soyinka, aliwahi kusema kwamba yeye anaamini kwamba mkoloni hakuwahi kuondoka Afrika. Alienda vacation nyumbani kwao kisha akarejea.Bado yupo hivi leo? Bila shaka…

Baada ya Uhuru,viongozi wetu,chini ya uongozi wa Mwalimu Julius Nyerere wakaona haifai kuwa wenyewe.Umoja ni Nguvu.Muungano wa Tanganyika  na Zanzibar ukazaa Tanzania ya leo. Vision nyingine hiyo ya viongozi wa zamani.Walitaka Afrika iliyoungana na kushikamana.Kama walifanikiwa au hawakufanikiwa ni jambo jingine.Nia yao ilikuwa dhahiri.

Kimsingi miaka 49 sio mingi. Katika ujenzi wa nchi ndio kabisaa. Ni nchi changa.Ndio maana huwa haina mantiki sana watu tunapokuwa “bize” kuifananisha Tanzania au Tanganyika na nchi kama Marekani ambayo ina zaidi ya miaka 400 ya Uhuru! Sijui kama huwa tunajiuliza ilikuwa wapi Marekani wakati ilipokuwa na miaka 49 ya Uhuru.Zilikuwa wapi nchi za G8 wakati zilipokuwa na umri kama wa Tanganyika?

Pamoja na hayo,kama ambavyo rafiki yangu Pius Mikongoti amesema hivi leo katika ukurasa wake wa Facebook, Tanganyika pamoja na “utoto” wake, hivi sasa anatakiwa angalau awe ashaanza kutembea! Badala yake,mtoto huyu bado anatambaa.Kwanini?

Majibu ya swali hilo,unayo wewe msomaji,ninayo mimi mwandishi,analo Mbunge wako,analo Rais Kikwete…tunayo.Cha msingi ni kukubali kwamba sasa wakati umefika wa kutenda kilicho sahihi.

Tukiachana na hayo hapo juu,leo ni wikiendi.Zilipendwa.Tunao Kiko Kids Jazz na wimbo wao maarufu Tanganyika na Uhuru.Sikiliza.

Be Sociable, Share!

•